- राज्यात गेल्या काही दिवसांपासून सुरू असलेला समाधानकारक पाऊस काही दिवसांसाठी विश्रांती घेणार असल्याचे भारतीय हवामान विभागाने स्पष्ट केले आहे. राज्यात 17 जुलैपर्यंत मोठा पाऊस होण्याची शक्यता नाही. हवामान विभागाने दिलेल्या अंदाजानुसार, 20 जुलैपासून पुन्हा पावसाचे नवीन चक्र सक्रिय होणार आहे. त्यामुळे पावसासाठी प्रतीक्षा करणाऱ्या शेतकऱ्यांनी काही काळ संयम ठेवावा लागणार आहे.
- राज्यात सध्या काही भागांत तुरळक ते मध्यम स्वरूपाचा पाऊस सुरू असला तरी मोठ्या प्रमाणावर पावसाने उघडीप घेतली आहे. विशेषतः कोकण, विदर्भ आणि मराठवाड्यात जिथे गेल्या आठवड्यात मुसळधार पावसाची नोंद झाली होती, तिथेही आता वातावरण निवळलेले आहे. हवामान विभागाने कुठल्याही भागासाठी रेड किंवा ऑरेंज अलर्ट जारी केलेला नाही.
- अरबी समुद्रातून येणाऱ्या मान्सून वाऱ्यांमध्ये सध्या कमकुवतपणा जाणवत आहे. या वाऱ्यांचा प्रभाव महाराष्ट्राच्या पश्चिम किनारपट्टीवर कमी झाला आहे. तसेच मान्सूनच्या पश्चिम टोकाची स्थितीही थोडीशी उत्तरेकडे सरकली आहे. त्यामुळे पावसाच्या नियमिततेवर परिणाम झाला आहे.
- दरम्यान, जुलैच्या तिसऱ्या आठवड्यापासून बंगालच्या उपसागरात हवेचा दाब अनुकूल होण्याची शक्यता व्यक्त करण्यात आली आहे. त्या अनुषंगाने राज्यात पुन्हा पावसाचा जोर वाढण्याची शक्यता वर्तवण्यात आली आहे. त्यामुळे 20 जुलैपासून राज्यात पुन्हा जोरदार पावसाचे आगमन होईल, असा अंदाज आहे.
