भारताचे परराष्ट्रमंत्र्यांसह दोन महिला लष्करी अधिकाऱ्यांनी आज पत्रकार परिषद घेतली, यामध्ये ऑपरेशन सिंदूरची सर्व कहाणी भारतीय लष्करातील लेफ्टनंट कर्नल सोफिया कुरेशी यांनी सांगितली. परराष्ट्र सचिव विक्रम मिस्री, लेफ्टनंट कर्नल सोफिया कुरेशी आणि विंग कमांडर व्योमिका सिंग यांनी आज सविस्तर ब्रिफींग केले. भारतीय महिलांचा लष्करात किती महत्वाचा सहभाग आहे हे यावरुन दिसतेच पण जगालाही हे समजून आले आहे.
कोण आहेत लेफ्टनंट कर्नल सोफिया कुरेशी?
35 वर्षीय सोफिया कुरेशी कर्नल सोफिया कुरेशी या भारतीय सैन्यात लेफ्टनंट कर्नल पदावरील अधिकारी आहेत. त्या सध्या सिग्नल कॉर्प्समध्ये सेवा देत आहेत. कर्नल कुरेशी या भारतीय लष्कराच्या पहिल्या महिला अधिकारी आहेत, ज्या लष्कराच्या प्रशिक्षण सराव ‘एक्सरसाइज फोर्स 18’ कार्यक्रमाचे नेतृत्व करत आहेत. कर्नल कुरेशी या गुजरातमधील वडोदरा येथील आहेत. त्यांनी बायोकेमिस्ट्रीमध्ये पदव्युत्तर पदवी घेतली आहे. कुरेशी 1999 मध्ये शॉर्ट सर्व्हिस कमिशन अंतर्गत सैन्यात सामील झाल्या. त्यावेळी त्या फक्त 17 वर्षांच्या होत्या.
कुरेशीचे आजोबाही सैन्यात होते. सोफिया यांचे पती मेकॅनाइज्ड इन्फंट्रीमध्ये आर्मी ऑफिसर आहेत.
ऑपरेशन सिंदूर या महत्त्वपूर्ण लष्करी कारवाईची माहिती देशासमोर मांडणाऱ्या धाडसी अधिकाऱ्यांमध्ये भारतीय हवाई दलाच्या विंग कमांडर व्योमिका सिंग यांचाही समावेश होता. त्यांच्याबद्दल आणि त्यांच्या कार्याबद्दल अधिक जाणून घेऊया.
व्योमिका सिंग १८ डिसेंबर २००४ रोजी भारतीय हवाई दलात दाखल झाल्या. त्यांनी २१ एसएससी (महिला) फ्लाईंग पायलट कोर्सअंतर्गत आपले प्रशिक्षण पूर्ण केले. हा अभ्यासक्रम विशेषतः महिला अधिकाऱ्यांसाठी शॉर्ट सर्व्हिस कमिशनचा भाग म्हणून तयार करण्यात आला होता.
आपल्या सेवाकाळात विंग कमांडर सिंग यांनी प्रामुख्याने हेलिकॉप्टर उड्डाणे केली आहेत. त्यांनी चेतक सारख्या बहुउद्देशीय हेलिकॉप्टरचे यशस्वी सारथ्य केले आहे. हे हेलिकॉप्टर भारतीय हवाई दलात बचाव कार्य, आपत्कालीन मदत आणि इतर महत्त्वपूर्ण मोहिमांमध्ये वापरले जातात.
त्यांच्या समर्पण, कार्यक्षमता आणि उत्कृष्ट सेवेची दखल घेत १८ डिसेंबर २०१७ रोजी, म्हणजेच सेवेच्या १३ व्या वर्षी, व्योमिका यांना विंग कमांडर या पदावर पदोन्नती देण्यात आली. विंग कमांडर व्योमिका या भारतीय हवाई दलातील महिला अधिकाऱ्यांच्या वाढत्या आणि महत्त्वपूर्ण भूमिकेचे प्रतीक आहेत.
