- राज्यात पुन्हा एक धक्कादायक घटना समोर आली आहे. पुण्यात लग्नाआधीच साखरपुडा अन् प्रीवेडिंग शुट झाले होते. परंतु नवरीला मात्र नवरदेव पसंत नव्हता, त्यामुळे तिने नवऱ्याच्या हत्येचा भयंकर कट रचला. लग्न मोडण्यासाठी तिने थेट होणाऱ्या नवऱ्याला संपवण्याचाच निर्णय घेतला. त्याला मारण्याची सुपारी दिली होती. पोलिसांनी या कारस्थानाचा पर्दाफाश केला.
- या प्रकरणी पोलिसांनी पाच आरोपींना बेड्या ठोकल्या आहेत, परंतु सुपारी देणारी नवरी मात्र फरार झाली.
- मिळालेल्या माहितीनुसार, श्रीगोंदा तालुक्यातील अहिल्यानगर येथील मयुरी सुनील दांगडे हिचा विवाह कर्जत तालुक्यातील माही जळगाव येथील सागर जयसिंग कदम याच्याशी ठरला होता. कुटुंबियांनी सर्व तयारी केली, साखरपुडा झाला आणि लग्नापूर्वीचे शूटही झाले. सगळं काही ठीक चालले होते.
- पण दरम्यान मयुरीने तिचा विचार बदलला. तिला सागर आवडत नव्हता. त्याच्याशी लग्न करायचे नव्हते. परंतु लग्न मोडल्याने बदनामी होईल, म्हणून तिने हा धक्कादायक कट रचला.
- या भयानक कटात मयुरीने तिचा एक सहकारी संदीप गावडे याला सामील केले. दोघांनी मिळून सागर कदमला मारण्यासाठी दीड लाख रुपयांची सुपारी दिली. याप्रकरणी इतर काही लोकांचा देखील समावेश होता. सागर हा कर्जत तालुक्यातील माही जळगाव येथील रहिवासी आहे. तो एका हॉटेलमध्ये कूक म्हणून काम करतो. 27 फेब्रुवारी रोजी संध्याकाळी साडेसात वाजेच्या सुमारास तो कामावरून परतत असताना दौंड तालुक्यातील खामगाव फाट्याजवळील यवत पोलीस हद्दीतील एका हॉटेलजवळ काही लोकांनी त्याला अडवले. हल्लेखोरांनी सागरवर काठ्यांनी हल्ला केला. त्याला बेदम मारहाण केली आणि नंतर तेथून पळून गेले. गंभीर जखमी झालेल्या सागरने कसे तरी स्वतःला सावरत घटनेची पोलिसांना माहिती दिली.
- यानंतर यवत पोलीस ठाण्यात गुन्हा दाखल करण्यात आला आणि तपास सुरू झाला. पोलिसांनी या हल्ल्याचा तपास सुरू केला, तेव्हा संशयित आरोपी आदित्य शंकर दांगडे आणि इतरांची नावे समोर आली.
- पोलिसांनी त्याला श्रीगोंदा जिल्ह्यातून ताब्यात घेतले आणि त्याची चौकशी केली असता संपूर्ण कट उघडकीस आला. त्याने सांगितले की हे सर्व मयुरीच्या सूचनेवरून केले गेले. पोलिसांनी पाच आरोपींना अटक केली आहे.
- आदित्य शंकर दांगडे, संदीप दादा गावडे, शिवाजी रामदास जरे, सूरज दिगंबर जाधव आणि इंद्रभान सखाराम कोळपे अशी अटक आरोपींची नावे आहेत. हे सर्व आरोपी अहिल्यानगर येथील रहिवासी आहेत. गुन्ह्यात वापरलेली कारही जप्त करण्यात आली आहे, परंतु कटाची सूत्रधार वधू अजूनही फरार आहे. पोलीस तिचा शोध घेण्यात व्यस्त आहेत.
