ठाकरे गटाचे खासदार संजय राऊत यांनी आज राज्याचे मुख्यमंत्री एकनाथ शिंदे, देवेंद्र फडणवीस, अजितदादा पवार यांच्यावर सडकून टीका केली आहे. विधानसभा अध्यक्ष राहुल नार्वेकर यांच्या कार्यपद्धतीवरही राऊत यांनी काही प्रश्न उपस्थित केले आहेत.
कोर्टाने आणि विधीमंडळाच्या अध्यक्षांनी मनात आणले की कायद्याने वागायचे, तर मुख्यमंत्री पाच मिनिटसुद्धा त्या पदावर राहू शकत नाही. बेकायदेशीररित्या त्यांना त्या पदावर बसवले आहे. उपमुख्यमंत्री अजितदादा यांची सुद्धा आमदारकी जाणार आहे, जर कायद्याने वागले तर. २०२४ नंतर शिंदे, फडणवीस आणि अजितदादा यांना मोठा राजकीय धक्का बसणार असल्याचे भाकित राऊत यांनी वर्तवले आहे.
नार्वेकर यांच्या कार्यपद्धतीवर बोलताना राऊत यांनी म्हटले की, इतके बेकायदेशीर विधानसभा अध्यक्ष देशाच्या इतिहासात झाले नाहीत. त्यांनी कायद्याची भाषा करणे म्हणजे घटनेचा अपमान आहे. ते वकील आहेत, मात्र त्यांनी कायद्याची भाषा करणे म्हणजे हास्यजत्रा आहे.
