- राज्यात आगामी काळात स्थानिक स्वराज्य संस्थेच्या निवडणुका होणार आहेत. या पार्श्वभूमीवर राज्यातील सर्वच राजकीय पक्षाकडून तयारी केली जात आहे. दरम्यान ठाकरे गटातून एक मोठी बातमी समोर येत आहे. ठाकरे गटातून एका बड्या नेत्याची हकालपट्टी करण्यात आली आहे. ठाकरे गटाचे उपनेते सुधाकर बडगुजर यांची आज शिवसेना उद्धव बाळासाहेब ठाकरे पक्षातून हकालपट्टी करण्यात आली आहे. याबाबतची माहिती सहसंपर्कप्रमुख दत्ता गायकवाड आणि जिल्हाप्रमुख डी.जी. सूर्यवंशी यांनी पत्रकार परिषदेत दिली.
- विलास शिंदे यांच्यासह दहा ते बारा जण पक्षात नाराज असल्याचा दावा बडगुजर यांनी काल केला होता.
- बडगुजर गेल्या काही दिवसांपासून पक्षात नाराज असल्याच्या चर्चा ठाकरे गटात सुरू होत्या. ते भाजपशी जवळीक साधण्याचा प्रयत्न करीत आहेत, अशा चर्चा रंगल्या होत्या. यावर बडगुजर यांनी म्हटले होते की, मीच नाही. कमीत कमी संघटनेतील दहा-बारा लोक नाराज आहेत. संघटानात्मक बदल झाल्यापासून ते अस्वस्थ आहेत. हे वरिष्ठांच्या कानावर ते मी वेळोवेळी घातले आहे. यात सुधारणा करावी, अशी मागणी देखील केली होती.
- दरम्यान ठाकरे गटाने पत्रकार परिषदेचे आयोजन केले होते. या पत्रकार परिषदेमध्ये खासदार संजय राऊत यांचा नाशिकचे माजी जिल्हाप्रमुख दत्ता गायकवाड यांना फोन आला. त्यावेळी पक्षविरोधी कारवाई केल्याने बडगुजर यांची पक्षातून हकालपट्टी केल्याची घोषणा करण्यात आली. महत्त्वाचे म्हणजे या पत्रकार परिषदेला उपनेते सुधाकर बडगुजर अनुपस्थित होते, तर विलास शिंदे मात्र उपस्थित होते.
