प्रेम प्रकरणातून प्रियकराने प्रेयसीवर चाकूने हल्ला करून तिचा खून केला. त्यानंतर स्वतःवरही चाकूने वार करून घेऊन जीवन संपवल्याची खळबळजनक घटना बेळगांव जिल्ह्यात घडली आहे. ऐश्वर्या लोहार (वय- १९, रा. नवी गल्ली, शहापूर) असे प्रेयसीचे नाव असून प्रशांत कुंडेकर ( वय- २९, रा. येळ्ळूर) असे प्रियकराचे नाव आहे. ही घटना खासबाग सर्कलजवळील घरात मंगळवारी सायंकाळी उघडकीस आली.
पोलिसांनी दिलेल्या माहितीनुसार, प्रशांत आणि ऐश्वर्या यांचे दीड वर्षापासून प्रेमसंबंध होते. प्रशांत हा लग्न करून घेण्यासाठी इच्छुक होता. त्यामुळे तिच्या आईकडे लग्नासाठी मागणी घातली होती. मात्र, तिच्या आईने ‘चांगले काम करून चांगली कमाई कर, त्यानंतरच लग्न लावून देऊ,’ असे सांगितले होते. मंगळवारी प्रशांत हा ऐश्वर्याच्या खासबाग सर्कल जवळील मावशीच्या घरी आला होता. तेथे दोघांची भेट झाली होती. यावेळी लग्नावरून दोघांमध्ये वादावादी झाल्याचा संशय आहे.
लग्न करण्यास नकार दिल्याच्या कारणातून दोघांमध्ये वादावादी होऊन ही घटना घडल्याचे समजते. प्रशांतने ऐश्वर्यावर चाकूने हल्ला केला, तिच्या गळ्यावर, पोटावर चाकूने वार केला. त्यानंतर स्वतःही प्रशांतने चाकूने आपल्या गळ्यावर वार करून स्वतःला संपवले. प्रशांत हा व्यवसायाने फरशी बसविण्याचे काम करत होता, अशी माहिती पोलिस आयुक्त याडा मार्टिन यांनी दिली.
घरामध्ये कोणीच नसताना ही घटना घडल्याने सायंकाळी उशिरापर्यंत या घटनेची माहिती कोणालाच झाली नव्हती. घरातील सदस्य सायंकाळी घरी परतल्यानंतर ऐश्वर्या व प्रशांत या दोघांचे मृतदेह रक्ताच्या थारोळ्यात पडले होते. कुटुंबियांनी घटनेची माहिती शहापूर पोलिसांना दिली. त्यानंतर पोलिसांनी घटनास्थळी भेट देऊन पंचनामा केला.
