- करणी केल्याचा राग मनात ठेवून नणंद, तिचा भाऊ, तिचा मित्र यांनी महिलेचा खून केला. मृतदेह दगडाने बांधून विहिरीत टाकून पुरावा नष्ट केल्याप्रकरणी एका महिलेसह तीन जणांना बार्शी जिल्हा सत्र न्यायाधीश विक्रमादित्य मांडे यांनी जन्मठेपेची शिक्षा सुनावली आहे.
- लक्ष्मी पवार (वय-४०) असे खून झालेल्या महिलेचे नाव आहे. याप्रकरणी ताई अशोक काळे (वय-३०, रा. तरंगवाडी, ता. इंदापूर, जि. पुणे) यांनी ३१ जानेवारी २०२१ रोजी टेंभुर्णी पोलिस ठाण्यात खुनाचा गुन्हा दाखल केला होता. कीर्तीमाला आगतराव काळे (वय-२५), आगतराव लक्ष्मण काळे (वय-७३, दोघे रा-अकोले बु., ता-माढा), आकाश ऊर्फ अक्षय ऊर्फ रॉकी अशोक भालेकर (वय-२५, रा. मांजरी, जि. लातूर) अशी जन्मठेपेची शिक्षा झालेल्यांची नावे आहेत.
- माढा तालुक्यातील मौजे अकोले (बु) येथील आरोपी आगतराव काळे याचा मुलगा अपघातात मयत झाला होता. मुलाची बायको कोमलला तिची आई लक्ष्मी गोकुळ पवार हिला तिची नणंद कीर्तीमाला, प्रीती उर्फ गुड्डी, सासू विमल भेटू देत नव्हती. ३० जानेवारी २०२१ रोजी सायंकाळी सहा वाजण्याच्या सुमारास लक्ष्मी हीस मुलगी कोमल हिची भेट घालून देते म्हणून कीर्तीमाला, प्रीती यांनी बोलावून घेऊन तिच्याकडून पाच हजार रुपये घेतले.
- तिचा मयत भाऊ सोमनाथ अगतराव काळे याच्यावर लक्ष्मी हिने करणी केल्याचा राग मनात धरून कीर्तीमाला, प्रीती उर्फ गुड्डी, प्रीतीचा मित्र रॉकी उर्फ अक्षय उर्फ आकाश अशोक भालेकर, आगतराव काळे, विमल काळे या सर्वांनी कट रचून मयत लक्ष्मी हिचा कोयता, सुरा, लोखंडी कुऱ्हाड या हत्यारांनी खून केला. त्यानंतर साडीस दगड बांधून तिचा मृतदेह विहिरीतील पाण्यात टाकून देऊन पुरावा नष्ट केला.
- मयताची बहीण ताई अशोक काळे हिने टेंभूर्णी पोलीस ठाण्यात गुन्हा दाखल केला होता. तत्कालीन पोलिस निरीक्षक राजकुमार केंद्रे यांनी तपास करुन आरोपींविरुद्ध सबळ पुरावा गोळा करून न्यायालयात दोषारोप पत्र दाखल केले होते. सरकार पक्षाच्या वतीने १४ साक्ष तपासण्यात आले. फिर्यादी, साक्षीदार करण भोसले, पोलिस तुकाराम माने देशमुख, तपास अधिकारी पोलिस निरीक्षक राजकुमार केंद्रे यांची साक्ष महत्त्वपूर्ण ठरली.
- सरकारी वकील दिनेश देशमुख यांनी सबळ पुराव्यानुसार उच्च न्यायालय, सर्वोच्च न्यायालयाचे दाखले देत जास्तीत-जास्त शिक्षा आरोपींना देण्यात यावी अशी मागणी न्यायालयासमोर केली. दोन्ही बाजू ऐकून न्यायालयाने आरोपींना खूनामध्ये दोषी ठरवून जन्मठेप, प्रत्येकी ३ हजार रुपये दंड, १४ वर्ष शिक्षा, प्रत्येकी २ हजार रुपये दंड, ३ वर्ष शिक्षा, प्रत्येकी १ हजार रुपये दंड अशी शिक्षा सुनावली.
