- आष्टी मतदारसंघातील सतीश भोसले उर्फ खोक्या भाईने शिरुर गावातील दिलीप ढाकणे आणि त्यांचा मुलगा महेश ढाकणे यांना मारहाण केल्याचा प्रकार घडला होता. भोसले याने ढाकणे आणि त्यांच्या मुलाला बेदम मारहाण केली होती. भोसले हा भाजपचा पदाधिकारी आहे. प्रचंड पैसा आणि दहशतीच्या जोरावर खोक्या भाईने या परिसरात आपला दबदबा निर्माण केला होता. खोक्या भाईच्या या दहशतीच्या थरारक कहाण्या आता एक-एक करुन बाहेर येत आहेत.
- भोसले उर्फ खोक्या भाईला हरीण आणि मोरांच्या शिकारीचा शौक होता. खोक्याने आतापर्यंत साधारण दोनशेपेक्षा जास्त हरिणांना मारल्याचे आजूबाजूच्या गावचे लोक सांगतात. याशिवाय डोंगरात वागूर (पक्षी पकडण्याचे जाळे) लावून कित्येक मोरही खाल्ले आहेत. आठ दिवसांपूर्वी भोसले आणि त्याचे सहकारी ढाकणे यांच्या शेतात हरीण पकडत होते. त्यावेळी ढाकणे यांनी त्यांना हरणं पकडण्यास मज्जाव केला. तेव्हा खोक्या भाई आणि त्याच्या सहकाऱ्यांनी ढाकणे, त्यांच्या मुलाला अमानुष मारहाण केली.
- यामध्ये ढाकणे यांचे 8 दात पडले आहेत आणि त्यांचा जबडा फ्रॅक्चर झाला आहे. ढाकणे यांच्या मुलाचाही पाय फ्रॅक्चर झाला आहे. त्याच्या अंगावर वारही आहेत. ढाकणे आणि त्यांचा मुलगा 19 फेब्रुवारीला पोलिसांकडे तक्रार करण्यासाठी गेले, तेव्हा एपीआय धोरवड यांनी त्यांना हाकलून लावले, असा आरोप गावकऱ्यांनी केला आहे. भोसले उर्फ खोक्या भाई हा आमदार सुरेश धस यांच्या जवळचा असल्याने उलट-सुलट चर्चा सुरू आहेत. त्यामुळे पोलिसांना आता आकावर गुन्हा दाखल केला नाही तर आम्ही शिरुर बंद करुन आमरण उपोषणाला बसू, असा इशारा गावकऱ्यांनी दिला आहे.
