‘छावा’ हा सिनेमा सध्या सोलापूरसह अन्य भागात चांगलाच गाजत आहे. या चित्रपटातील प्रत्येक पात्राने प्रेक्षकांची मने जिंकली आहेत. दरम्यान, चित्रपटात औरंगजेबाच्या नजरेला नजर देणारा ‘बाल संभाजी’ काही मिनिटांसाठी दाखवण्यात आला होता. पण हा चिमुकला नक्की आहे तरी कोण? असा प्रश्न सर्वांना पडला आहे. या सिनेमातील एक क्लिप सोशल मीडियावर तुफान व्हायरल झाली आहे.
या क्लिपमध्ये छत्रपती संभाजी महाराजांच्या बालपणीची भूमिका साकारणाऱ्या आठ वर्षांच्या चिमुकल्याने सर्वांचे लक्ष वेधले आहे. या बालकलाकाराचे नाव अभिनव साळुंखे आहे. अभिनवने प्रेक्षकांच्या मनात घर केले आहे. छत्रपती संभाजी महाराज हे लहानपणापासूनच निडर होते हे छावा सिनेमातून दाखवण्याचा प्रयत्न करण्यात आला आहे.
या चित्रपटातील एका सीनमध्ये अभिनवने सीन केला आहे. या सीनमध्ये भर दरबारात ‘शिवाजी नही आया?’ असे औरंगजेब विचारत असतो. तेवढ्यात बाल संभाजींची एण्ट्री होते. ते म्हणतात, ‘छत्रपती शिवाजी महाराज.’ त्यावर औरंगजेब गंमतीने त्यांना विचारतो की, ‘आपको बुखार नही आता?’ त्यावर बाल संभाजी उत्तर देतात की, ‘हमारी वजह से औरोको बुखार आता है.’ काही मिनिटांचा हा सीन मनाला चांगलाच भिडणारा आहे. या सिनेमात छत्रपती संभाजी महाराज्यांच्या बालपणीची भूमिका साकारणारा अभिनव हा मुंबईचा आहे. तो आठ वर्षांचा आहे.
