- गॅसच्या किमती, इंधनाचे दर, वाढती महागाई यामुळे जगणे मुश्किल झाले आहे. महागाई रोजच वाढत असल्याने नागरिकांच्या अडचणीत भर पडत आहे. यामुळे मोदी सरकारबद्दल जनतेच्या मनात असंतोष निर्माण झाला आहे. तर दुसरीकडे भाजपच्या फोडाफोडीच्या राजकारणाला जनता वैतागली आहे.
दरम्यान आगामी निवडणुकीत भाजपला झटका बसू शकेल, असा अहवाल समोर आला आहे. यामुळे भाजपची डोकेदुखी वाढण्याची शक्यता आहे.
देशाच्या पंतप्रधानपदी नरेंद्र मोदी हवेत, पण उमेदवार बदला, असे धक्कादायक निष्कर्ष भारतीय जनता पार्टीच्या सर्वेक्षणात आले असल्याने आमदार-खासदारांना उमेदवारीची मोठी चिंता वाटू लागली आहे. भाजपाच्या विद्यमान खासदार आणि आमदारांपैकी सध्याच्या परिस्थितीत साधारणपणे 60 टक्के जागा भाजपा जिंकू शकते आणि 40 टक्के जागा धोक्यात असल्याचा निष्कर्ष भाजपाने केलेल्या सर्वेक्षणात नोंदविण्यात आले आहे.
गेल्या दोन-अडीच महिन्यात भाजपा पक्षश्रेष्ठींनी तीन-चार राजकीय सर्वेक्षण कंपन्यांकडून राज्यातील प्रत्येक लोकसभा-विधानसभा मतदारसंघाचे सर्वेक्षण केले. दरम्यान, उपमुख्यमंत्री अजितदादा पवार शिंदे सरकारमध्ये सामील झाल्यावर पुन्हा नव्याने सर्वेक्षण करण्यात आले. प्रत्येक मतदारसंघातील राजकीय परिस्थिती, आमदार-खासदारांचे कार्य, जनता व पदाधिकार्‍यांशी वर्तन, समाजमाध्यमांवरील सहभाग, जनतेचे मोदी आणि आमदार-खासदाराविषयीचे मत आदी बाबींविषयी विस्तृत सर्वेक्षण करण्यात आले. त्यानुसार राज्यातील प्रत्येक आमदार-खासदाराच्या मतदारसंघातील परिस्थितीचा आढावा उपमुख्यमंत्री देवेंद्र फडणवीस, केंद्रीय सहसंघटन मंत्री शिवप्रकाश आणि प्रदेशाध्यक्ष चंद्रशेखर बावनकुळे यांनी घेतला.
त्यात भाजपाच्या प्रत्येक आमदार-खासदाराचे सर्वेक्षणानुसारचे रिपोर्ट कार्ड देण्यात आले व त्याविषयी कुठेही वाच्यता न करण्याची ताकीद देण्यात आली आहे.
या सर्वेक्षणात जनतेकडून पंतप्रधान मोदी आणि आमदार-खासदाराबाबत घेतलेल्या प्रतिसादानुसार 50-60टक्के लोकांनी पंतप्रधान मोदींना पसंती दिली आहे. मात्र, उमेदवार बदलण्याचे मत व्यक्त केले आहे. संबंधित लोकप्रतिनिधीने कोरोना काळात व नंतरही आरोग्य प्रश्नी मदत केली नाही, अन्य कामे केली नाहीत, उर्मटपणे वागणूक दिली जाते, भ्रष्टाचार आहे आदी अनेक तक्रारी केल्या आहेत. दरम्यान, भाजपा पक्षश्रेष्ठींनी हा अहवाल गंभीरपणे घेतला असून पुढील सर्वेक्षण आता डिसेंबरमध्ये होणार आहे.
