भरधाव रेडीमिक्स डंपर वळण घेताना अचानक पलटी झाला. त्याच वेळी बाईकवरून चाललेल्या दोन विद्यार्थिनी डंपरखाली सापडल्या आणि चिरडल्या गेल्या.
ही घटना पुणे येथील हिंजवडी- माण रस्त्यावरील वडजाईनगर कॉर्नरजवळ काल सायंकाळी घडली. यात डंपरचालकाला ताब्यात घेण्यात आले आहे.
प्रांजली महेश यादव (वय – 22, रा. गोदरेज प्रॉपर्टीज्, म्हाळुंगे; मूळ रा. टेंभुर्णी, ता. माढा) आणि आश्लेषा नरेंद्र गावंडे (वय – 22, रा. गोदरेज प्रॉपर्टीज्, म्हाळुंगे; मूळ रा. शेगाव, अमरावती) अशी मृत्युमुखी पडलेल्या दोन विद्यार्थिनींची नावे आहेत. सहायक पोलीस आयुक्त राजेंद्र कुराडे यांनी याबाबत माहिती दिली.
प्रांजली आणि आश्लेषा या एमआयटी कॉलेजध्ये विज्ञान शाखेत शेवटच्या वर्षात शिकत होत्या. काल सायंकाळी त्या बाईकवरून चालल्या होत्या. वडजाईनगर कॉर्नरजवळ भरधाव आलेल्या डंपरचालकाचे वळणावर नियंत्रण सुटले आणि डंपर पलटी झाला. प्रांजली आणि आश्लेषा या डंपरखाली सापडल्या. तीन क्रेनच्या मदतीने डंपर बाजूला घेण्यात आला.
डंपरमध्ये तब्बल 32 टन सिमेंट होते. डंपरचालकाचे वळणावर नियंत्रण सुटल्याने डंपर पलटी झाला आणि 32 टनच्या या बोजाखाली दबल्या गेल्याने या दोन्ही तरुणींचा चेंदामेंदा झाला.
