राज्यात भीषण अपघात घडल्याची घटना उघडकीस आली आहे. एका प्रवासी ट्रॅव्हल्सचा ताबा सुटल्याने ती पलटी झाली असून या दुर्घटनेत पाच जणांचा मृत्यू झाला आहे, तर ३५ प्रवासी गंभीर जखमी झाले आहेत. ट्रॅव्हल्समध्ये काही प्रवासी अडकले असल्याची माहिती समोर आली आहे. ही ट्रॅव्हल्स पुण्याहून चाकणवरून वीरवाडीला (महाड) लग्नाला चालली होती.
संगीता धनंजय जाधव, गौरव अशोक दराडे, शिल्पा प्रदिप पवार, वंदना जाधव अशी चार मृतांची नावे असून पाचव्या मृत व्यक्तीचे नाव समजू शकले नाही. ताम्हीणी घाटात पर्पल ट्रॅव्हल्सच्या खाजगी बसमधून जाधव कुटुंबीय पुण्यातील लोहगाव येथून बिरवाडी महाड येथे लग्न समारंभास जात होते. ताम्हीणी घाटातील धोकादायक वळणावर चालकाचे नियंत्रण सुटल्याने ही गाडी पलटी झाली आहे.
यामधे दोन पुरुष व तीन महिला अशा एकूण पाच जणांचा मृत्यू झाला आहे. २७ जखमी लोकांना बाहेर काढून माणगाव ग्रामीण रुग्णालयात पाठवण्यात आले. बचाव पथक आणि पोलिस घटनास्थळी काम करत आहेत. हा अपघात आज सकाळी ९ ते ९.३० च्या सुमारास घडला असून बसमध्ये ४० च्या आसपास प्रवासी असल्याची प्राथमिक माहिती मिळत आहे.
