- दादागिरी २ या रियॅलिटी शोचे विजेतेपद पटकावणारा टीव्ही अभिनेते नितीन चौहान याचे काल मुंबईत निधन झाले. उत्तर प्रदेशातील अलिगड येथील रहिवासी असलेल्या नितीन याने वयाच्या अवघ्या ३५ व्या वर्षी अखेरचा श्वास घेतला. ‘दादागिरी २’ जिंकल्यानंतर नितीनला मोठी ओळख मिळाली. याशिवाय नितीन एमटीव्हीच्या ‘स्प्लिट्सव्हिला ५’, ‘Zindagi.com’, ‘क्राईम पेट्रोल’ आणि ‘फ्रेंड्स’ या मालिकांमध्ये झळकला आहे. नितीनच्या आकस्मिक निधनाने सर्वांनाच आश्चर्याचा धक्का बसला आहे.
- नितीन २०२२ मध्ये सब टीव्हीवरील ‘तेरा यार हूं मैं’ या मालिकेत दिसला होता. नितीनच्या निधनाच्या वृत्ताला त्याचे सहकलाकार सुदीप साहिर आणि सायंतनी घोष यांनी दुजोरा दिला आहे. मात्र, यापेक्षा अधिक माहिती त्यांनी शेअर केलेली नाही. नितीनची माजी को-स्टार विभूती ठाकूर हिने केलेल्या पोस्टनुसार, त्याने आत्महत्या केल्याचे म्हटले जात आहे. मात्र, अधिक माहितीची प्रतीक्षा आहे. नितीनचे वडील आपल्या मुलाचे पार्थिव घेण्यासाठी मुंबईत दाखल झाले आहेत. पोलीस या प्रकरणाचा तपास करत आहेत. सध्या नितीनचे वडील किंवा त्याचे कुटुंबीय किंवा पोलिसांकडून याबाबत कोणतेही अधिकृत वक्तव्य करण्यात आलेले नाही.
