- राज्यात विधानसभा निवडणुकांची रणधुमाळी जोमात सुरू आहे. अर्ज माघारीची मुदत संपल्यानंतर निवडणुकीचे खरे चित्र स्पष्ट झाले आहे. आता उमेदवारांनी प्रचाराला सुरुवात केली आहे. दरम्यान, उमेदवारांच्या प्रचारासाठी सभांचे आयोजन करण्यात येत आहे. या सभेत नेत्यांकडून आरोप प्रत्यारोप करण्यात येत आहे. अशात काँग्रेस नेते आणि विधानसभेतील विरोधी पक्षनेते विजय वडेट्टीवार यांचा एक व्हिडिओ चांगलाच व्हायरल झाला आहे.
- या व्हिडिओत वडेट्टीवार यांनी शिवीगाळ केल्याचा आरोप भाजपकडून केला जात आहे. सोशल मीडियावर भाजपकडून हा व्हिडिओ शेअर करत काँग्रेसवर टीका करण्यात आली आहे.
- दरम्यान भाजपने सोशल मीडियावर हा व्हिडिओ शेअर करत लिहिले आहे की, काँग्रेसचा हात, मतदारांचा घात. कॉंग्रेस नेते, @VijayWadettiwar
- मतदारांना हरा*खोर म्हणत आहे. 20 तारखेनंतर तुला पाहून घेईन, तुमचे नाव लिहून ठेवले आहेत, अशी धमकीच त्यांनी मतदारांना दिली आहे. लोकशाहीत मतदार हा राजा असतो. मात्र, लोकशाही, संविधान, अभिव्यक्ती स्वातंत्र्य याचा काँग्रेसला सुरुवातीपासूनच तिटकारा आहे. ज्या काँग्रेसने संविधानाची पायमल्ली करत देशावर आणीबाणी लादली. असंख्य सामान्य लोकांना तुरूंगात डांबून ठेवले. ती काँग्रेस पुन्हा मतदारांना धमकवण्याचा प्रयत्न करत आहे. महाराष्ट्राची जनता काँग्रेसची ही मस्ती मतदानातून नक्कीच उतरवणार.
