- विधानसभा निवडणुकीसाठी काँग्रेसने देखील आज आपली पहिली यादी जाहीर केली आहे. यादीमध्ये काँग्रेसने 48 उमेदवारांच्या नावांची घोषणा केली आहे. काँग्रेसने लातूर ग्रामीणमधून धीरज देशमुख यांना उमेदवारी जाहीर केली आहे. तर संगमेरमधून बाळासाहेब थोरात यांना उमेदवारी जाहीर करण्यात आली आहे.
- माजी मुख्यमंत्री पृथ्वीराज चव्हाण यांना दक्षिण कराडमधून उमेदवारी देण्यात आली आहे. तर नाना पटोले यांना साकोली विधानसभा मतदारसंघातून उमेदवारी देण्यात आली आहे.
- नितीन राऊत यांना नागपूर उत्तरमधून काँग्रेसने उमेदवारी दिली आहे. मालाड पश्चिममधून अस्लम शेख निवडणुकीच्या रिंगणात उतरणार आहे तर पुरंदरमधून संजय जगताप यांना काँग्रेसकडून संधी देण्यात आली आहे. तर भोरमधून संग्राम थोपटेंना, रवींद्र धंगेकर यांना कसबा विधानसभा मतदारसंघातून उमेदवारी देण्यात आली आहे.
- तर दुसरीकडे विधानसभा विरोधी पक्षनेते विजय वडेट्टीवार ब्रम्हपुरी विधानसभा मतदारसंघातून पुन्हा एकदा निवडणुकीच्या रिंगणात उतरणार आहे. तिवसा विधानसभा मतदारसंघातून चौथ्यांदा यशोमती ठाकूर यांना उमेदवारी देण्यात आली आहे. याचबरोबर नागपूर पश्चिममधून विकास ठाकरे यांना काँग्रेसने उमेदवारी जाहीर केली आहे.
- अमरावती विधानसभा मतदारसंघातून सुनील देशमुख यांना उमेदवारी जाहीर करण्यात आली आहे. याच बरोबर चांदिवली विधानसभा मतदारसंघातून मोहम्मद आरिफ नसीम खान यांना उमेदवारी देण्यात आली आहे. सिद्धाराम म्हेत्रे यांना अक्कलकोट येथून उमेदवारी देण्यात आली आहे.
