- गेल्या काही दिवसात गुन्हेगारीच्या घटनांमध्ये वाढ झाली आहे. सोलापूर, पुणे, मुंबई, बीड, कोल्हापूर, नाशिक, छत्रपती संभाजीनगर अशा मोठ्या शहरात गुन्हे घडत आहेत. त्यात आता नागपूर शहरातही सर्वांनाच हादरवून सोडणारी घटना घडली आहे. नागपूरमध्ये मित्रानेच मित्राची हत्या केल्याची घटना समोर आली आहे.
- गर्लफ्रेंडची छेड काढतो या संशयावरून मित्रानेच मित्राचा खून केला. एकाने दुसऱ्याच्या डोक्यात दगड घालून ही हत्या केली आहे. यामुळे नागपूरमध्ये खळबळ उडाली आहे. नागपुरातील तहसील पोलीस स्टेशन हद्दीत असलेल्या अग्रसेन चौकात ही घटना घडली. रविवारी रात्री हा खून झाला. भर बाजारात ही घटना घडली आहे.
- अनुराग आणि शैलेश हे दोघेही गुन्हेगारी पार्श्वभूमी असलेले आहेत. ते दोघेही होशंगाबाद सेंट्रल जेलमध्ये भेटले होते. तेव्हापासून या दोघांमध्ये मैत्री होती. मागील काही वर्षीपासून हे दोघेही नागपुरात राहत होते. दरम्यान सोनू मरसकोले ही मुलगी अनुराग बरोबर लिव्ह इनमध्ये राहत होती. पण शैलेश तिची छेड काढत होता. याची माहिती अनुरागला मिळाली होती. याचा राग अनुरागच्या मनात बसला होता. त्याला ही गोष्ट सहन झाली नाही.
- या गोष्टी राग मनात धरून अनुरागने रविवारी रात्री शैलेशचा काटा काढण्याचे ठरवले. त्याने अग्रसेन चौकात शैलेशला भेटण्यासाठी बोलवले. भेटायला बोलावल्यामुळे शैलेशही चौकात गेला. तो आल्यानंतर अनुरागने एक मोठा दगड शैलेशच्या छातीत मारला. नंतर तोच दगड त्याने त्याच्या डोक्यावर मारला. त्यात तो प्रचंड रक्तबंबाळ झाला. पोलिसांना याची माहिती मिळताच त्यांनी शैलेशला रुग्णालयात दाखल केले. पण डॉक्टर यांनी त्याला मृत घोषित केले. पोलिसांनी हत्येचा तपास करत आरोपी अनुरागला जेरबंद केले आहे.
