छत्रपती संभाजी महाराज यांच्या जीवनावरील ‘स्वराज्यरक्षक संभाजी’ या टीव्ही मालिकेतील ‘राणूआक्का’ फेम अभिनेत्री अश्विनी महांगडे हिने नव्या इनिंगला सुरुवात केली आहे. अश्विनीने ज्येष्ठ नेते शरद पवार यांच्या नेतृत्वाखालील राष्ट्रवादी काँग्रेसमध्ये प्रवेश केला आहे.
अश्विनीला घरातूनच राजकीय वारसा आहे. तिचे वडील पवारांचे निष्ठावंत कार्यकर्ते होते. लोकसभा निवडणुकीत अश्विनी ही पवार यांच्या पक्षाच्या उमेदवारांच्या प्रचारातही दिसली होती. ती सामाजिक कार्यातही सक्रिय आहे. परिणामी ती राजकीय क्षेत्रात पदार्पण करेल, अशी अपेक्षा होतीच. ती खरी ठरली आहे.
राष्ट्रवादी काँग्रेसचे प्रदेशाध्यक्ष जयंत पाटील व खासदार अमोल कोल्हे यांच्या उपस्थितीत तिने नुकतीच तुतारी हाती घेतली. पक्ष प्रवेशानंतर तिने इन्स्टाग्रामवर सविस्तरही पोस्टही शेअर केली आहे.
