- महाराष्ट्रातील विधानसभा निवडणुकीत महायुतीने ऐतिहासिक विजय मिळवला आहे. यंदा महाविकास आघाडीला मात्र धक्का बसला आहे. विधानसभा निवडणुकीचा निकाल अनपेक्षित लागल्याने राज्याच्या राजकारणात मोठ्या प्रमाणावर चर्चा रंगल्या आहेत. तर दुसरीकडे महायुतीचे नेते मंत्री मात्र जल्लोष साजरा करताना दिसत आहेत.
- निकाल स्पष्ट झाल्यानंतर मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजितदादा यांनी पत्रकार परिषद घेत मुख्यमंत्रीपदाबाबत माहिती दिली. सोमवारी वानखेडे स्टेडियमवर मुख्यमंत्रीपदाचा शपथविधी सोहळा संपन्न होणार आहे. दरम्यान राज्यात महायुतीची सत्ता आल्यानंतर आता सत्तास्थापनेच्या हालचालींना वेग आला आहे. अजितदादा यांची विधिमंडळाच्या गटनेते पदी निवड करण्यात आली आहे.
- आज देवगिरी बंगल्यावर झालेल्या बैठकीत सर्व आमदारांच्या उपस्थितीत एकमताने अजितदादा यांची गटनेता म्हणून निवड करण्यात आली आहे. विधानसभेमध्ये बहुमत सिद्ध करण्यासाठी बहुमत चाचणी होईल. या सगळ्याच्या पार्श्वभूमीवर घडामोडींना महत्त्व प्राप्त होत आहे.
