अक्षय शिंदे एन्काऊंटर प्रकरणात मनसे अध्यक्ष राज ठाकरे यांच्या पत्नी शर्मिला ठाकरे यांनी एकदम रोखठोक भूमिका मांडली. अक्षयने केलेल्या गोळीबारात जखमी झालेल्या पोलीस अधिकारी निलेश मोरे यांची त्यांनी आज भेट घेतली. त्यानंतर माध्यमांशी त्यांनी संवाद साधला. मी ठल्याही राजकीय पक्षाच्यावतीने किंवा राज ठाकरेंची बायको म्हणून बोलत नाही. मी आज इथे महिला म्हणून बोलत आहे, असे त्या म्हणाल्या.
मला स्वत:ला मुलगी आहे. मी महिलांच्या बाजूने, त्यांची एक प्रतिनिधी म्हणून बोलत आहे. आमच्यात इतकी असुरक्षिततेची भावना निर्माण झाली. आम्ही दररोज जे पेपरमध्ये वाचतो, महिलांविरोधात हिंस्त्र गुन्हे घडतात. बलात्कार केल्यानंतर वाईट पद्धतीने खून होतो. इतर राजकारणी काय बोलतात, विरोधी पक्ष काय बोलतात, कोर्ट काय बोलते ? याचे मला काही पडलेले नाही. महिला म्हणून मला अभिमान वाटला. त्या पोलिसांचे कौतुक केले पाहिजे. अक्षय शिंदे कोणी संत नव्हता. महिलांमध्ये अशी सुरक्षिततेची भावना निर्माण होण्यासाठी असे एन्काऊंटर झाले पाहिजेत, असे ठाकरे म्हणाल्या.
पोलिसांनी एन्काऊंटर केले असेल तर पोलिसांचे अभिनंदन आणि जाणून बुजून एन्काऊंटर केले असेल तर पोलिसांचे डबल अभिनंदन, असा आलेला एक मेसेज त्यांनी वाचून दाखवला.
