- राज्यातील विविध भागात अलीकडे गुन्हेगारीचे प्रमाण वाढत आहे. दरम्यान, पुण्यातील खेड तालुक्यात एक धक्कादायक घटना घडली आहे. मामानेच आपल्या भाच्याच्या डोक्यात लाकडी ठोकळा मारून अन गळा दाबून खून केला. ही घटना खेड तालुक्‍यातील रासे गावाच्‍या हद्दीत काल सकाळी उघडकीस आली आहे. संदीप खांडे (वय 40, रा. ठाकर वस्ती, रासे, ता. खेड, जि. पुणे), असे खून झालेल्‍या भाच्‍याचे नाव आहे. पोलिसांनी आरोपी सुरेश मेंघळ (वय 36, रा. ठाकर वस्ती, रासे) याला अटक केली असून त्याने खुनाची कबुली दिली आहे.
पोलिसांनी दिलेल्‍या माहितीनुसार, चाकण पोलीस ठाण्याच्या हद्दीतील रासे गावात ही घटना घडली असून पोलिसांनी आरोपी सुरेश याला ताब्‍यात घेतल्यावर त्याने खुनाची कबुली दिली. मयत संदीप हा आरोपी सुरेश यांचा भाचा असून या दोघांमध्ये यापूर्वी देखील दारू प्‍यायल्यानंतर भांडण झाल्याची माहिती पोलिसांनी दिली.
अनंत चतुर्दशीच्‍या दिवशी हे मामा-भाचे वाद्य वाजवण्‍यासाठी मुंबईला गेले होते. त्‍यांना प्रत्‍येकी ४४० रुपये मजुरी मिळाली. त्‍यामुळे बुधवारी ते पुन्हा दारू प्‍यायला बसले. त्‍यावेळी त्‍यांच्‍यात पुन्हा भांडण झाले. यामुळे संतापलेल्‍या मामा सुरेश याने लाकडी ओंडका संदीप याच्‍या डोक्यात मारला. यामुळे संदीप हा गंभीर जखमी झाला. त्‍यानंतर आरोपी सुरेश इथेच थांबला नाही तर त्याने गळा दाबून संदीप याचा खून केला. गुन्‍हा घडल्‍यावर चाकण पोलिसांनी आरोपीला त्‍वरीत अटक केली.
