सोलापूर (प्रतिनिधी) लाडक्या गणरायाला मंगळवारी गणेशभक्‍त निरोप देणार असून विविध मंडळाकडून लेझीम,झांज,डॉल्बीच्या तालावर थिरकत बाप्पाला निरोप देत असतात.दरम्यान श्री गणेश उत्सवाच्या विसर्जनासाठी पोलिसांचा तगडा बंदोबस्त ठेवण्यात आला असून शहरात फिक्स पाँईट,प्रमुख १४ ठिकाणी गणेश विसर्जन,७८ ठिकाणी गणेश मुर्ती संकलन ठिकाणी व विसर्जन मार्गावर बंदोबस्त लावण्यात आला आहे. गणेशोत्सव विसर्जनासाठी पोलीस प्रशासन सज्ज झाले आहे.
सोलापूर शहरात गणेशोत्सव साजरा करण्यात आला आहे.अनंत चतुदर्शी निमित्त सोलापूर शहरात श्री गणेश मुर्तीचे सार्वजनिक मिरवणुकीद्वारे आणि स्वतंत्ररित्या विसर्जन होणार आहे.शहरात शांतता व सुव्यवस्था अबाधित रहावी तसेच विसर्जन शांततेत व सुरळीत व्हावे यासाठी पोलीस आयुक्‍तालयाच्या वतीने तगडा बंदोबस्त लावण्यात आला आहे.
या पोलीस बंदोबस्तात पोलीस उपायुक्‍त ३, सहा.पोलीस आयुक्‍त ६ असणार असून यापैकी एक बाहेरील आहे, पोलिस निरीक्षक २६,सपोनि व पोसई एकुण ९७ असणार असून त्यापैकी स्थानिक ७२ तर बाहेरील २५,पोलिस अंमलदार स्थानिक १३१९, बाहेरील २५ असे एकुण १३४४, होमगार्ड बाहेरील ४३६, एसआरपीएफची एक कंपनी असणार आहे.
येथील मार्ग बंद राहणार
सोलापूर शहरातील लोकमान्य मध्यवर्ती, मध्यवर्ती, पूर्व विभाग, लष्कार विभाग, विजापूर नाका, होटगी रोड, घरकुल, नीलम नगर,बाळे येथील परिसरातील मार्ग बंद राहणार आहे.
