- राज्यात विधानसभा निवडणूक अगदी काही दिवसांवर येऊन ठेपली आहे. अशातच राज्यात राजकीय घडामोडींना प्रचंड वेग आला आहे. आता विधानसभा निवडणुकीच्या पार्श्वभूमीवर राष्ट्रवादी शरदचंद्र पवार पक्षाचे अध्यक्ष शरद पवार सध्या अ‍ॅक्टिव्ह मोडवर आहेत. कारण पवार विधानसभा निवडणुकीसाठी भन्नाट अशी रणनिती आखत आहेत. अशातच आता भाजपचे वरिष्ठ नेते लवकरच राष्ट्रवादी गटात प्रवेश करणार आहेत, अशी घोषणा करण्यात आली आहे.
गेल्या काही दिवसांपूर्वी पवारांनी कोल्हापूरमध्ये भाजपला धक्का दिला होता. कोल्हापूरमध्ये समरजित घाटगे यांनी भाजपला सोडचिठ्ठी देत शरद पवार गटात प्रवेश केला. अशातच आता पुण्यातदेखील भाजपचे वरिष्ठ नेते शरद पवार गटात प्रवेश करणार असल्याची घोषणा करण्यात आली आहे. त्यामुळे पवार पुण्यात भाजपला धक्का देण्याच्या तयारीत आहेत.
पुण्यातील वडगाव शेरीमध्ये भाजपला मोठा धक्का बसण्याची शक्यता वर्तवण्यात आली आहे. कारण माजी आमदार आणि भाजपचे जेष्ठ नेते बापूसाहेब पठारे हे भाजपला रामराम करण्याची दाट शक्यता आहे. त्यामुळे पठारे यांची लवकरच घरवापसी होण्याची शक्यता आहे. पठारे हे हाती तुतारी घेणार असल्याचे त्यांनी एका गणपती मंडळाच्या कार्यक्रमात स्पष्ट केले आहे.
