- पुण्यात काल रात्री धक्कादायक घटना घडली. राष्ट्रवादी काँग्रेसचे ( अजित पवार गट ) माजी नगरसेवक वनराज आंदेकर हे एका कार्यक्रमानिमित्त नाना पेठेत आले असता त्यांच्यावर तब्बल सहा बाईकवरून आलेल्या १३ ते १५ जणांनी गोळीबार केला. यासोबतच त्यांच्यावर कोयत्यानेसुद्धा हल्ला केला. यात आंदेकरचा जागीच मृत्यू झाला. पोलिसांनी फरार आरोपींना अटक केली आहे. या तपासात धक्कादायक माहिती पुढे आली आहे. कौटुंबिक वादातून वनराज यांची हत्या करण्यात आली असून बहीण व मेहुण्याने वनराज यांच्यावर हल्ला केल्याची माहिती आहे. पोलिसांनी आरोपींना अटक केली आहे.
वनराज हत्येप्रकरणी आतापर्यंत संजीवनी जयंत कोमकर (रा. ३०९, नाना पेठ), जयंत लक्ष्मण कोमकर, प्रकाश जयंत कोमकर, गणेश लक्ष्मण कोमकर, सोमनाथ सयाजी गायकवाड (रा. आंबेगाव पठार, धनकवडी), अनिकेत दूधभाते (रा. आंबेगाव पठार, धनकवडी), तुषार उर्फ आबा कदम (रा. धनकवडी), सागर पवार (रा. धनकवडी), पवन करताल (रा. मंगळवार पेठ) सॅम ऊर्फ समीर काळे यांच्यासह आणखी पाच जणांवर गुन्हा दाखल करण्यात आला आहे. याप्रकरणी वनराजचे वडील सूर्यकांत ऊर्फ बंडू राणूजी आंदेकर (वय ६८, रा. सोनाई दादा निवास, नाना पेठ) यांनी फिर्याद दिली आहे.
वनराज यांची हत्या कौटुंबिक वादातून झाल्याचे पुढे आले आहे. वनराज यांची सख्खी बहीण व मेहुणा या हल्ल्यामागे असल्याची माहिती पुढे आली आहे. एका भांडणात मध्यस्थी करून भांडणे मिटवल्याने व दुकानाचे अतिक्रमण पाडायला लावल्याने आलेल्या रागातून बहिणीने वनराजला मारण्याची धमकी दिली होती. दरम्यान, काल एका टोळक्याने वनराजवर हल्ला करून त्यांची हत्या केली.
संजीवनी ही वनराजची बहीण आहे, तर, जयंत कोमकर हा जावई आहे. आरोपींचे एक सप्टेंबर रोजी आकाश सुरेश परदेशी याच्याशी भांडण झाले होते. हे भांडण पोलिस ठाण्यात पोहोचले. समर्थ पोलीस ठाण्यात तक्रार देण्यासाठी आरोपी गेले असता शिवम व वनराज आंदेकर हे पोलीस ठाण्यात आले. यावेळी संजीवनी व जयंत यांनी आकाशला मारहाण केली. हे भांडण शिवम आंदेकर यांनी सोडवले. त्यावेळी संजीवनी हिने वनराजला ‘तुला पोरं बोलवून ठोकतेच’ अशी जीवे मारण्याची धमकी दिली होती.
