देशात सध्या लोकसभा निवडणुकीची रणधुमाळी सुरू आहे. यासाठी सर्वच राजकीय पक्षांनी आपली ताकद पणाला लावली आहे. दरम्यान, रायगडमध्ये काल मध्यरात्री मोठा राडा झाला. ठाकरे गटाचे जिल्हाप्रमुख अनिल नवगणे यांच्यावर रात्री १.३० च्या सुमारास अज्ञात व्यक्तिंनी जीवघेणा हल्ला केला. नवगणे रात्री आपल्या घरी परतत असताना त्यांच्या गाडीवर दगडफेक करण्यात आली. शिंदे गटाने हा हल्ला केल्याचा आरोप नवगणे यांनी केला आहे. नवगणे हे इंदापूरला जात होते. यावेळी लोणेर वीर मार्गावर त्यांच्या गाडीवर दगडफेक करण्यात आली. या हल्ल्यानंतर आरोपी फरार झाले. या प्रकरणी माणगाव पोलीस ठाण्यात गुन्हा दाखल करण्यात आला असून पोलिस आरोपींचा शोध घेत आहेत. रायगड येथील महाड येथे काल महाविकास आघाडीच्या नेत्यांची सभा झाली.
या सभेत नवगणे यांनी भरत गोगावले तसेच त्यांचा मुलगा विकास गोगावले यांच्यावर जोरदार टीका केली होती. ही टीका गोगवले यांच्या समर्थकांना जिव्हारी लागल्याचे बोलले जात आहे. महाड येथील सभा आटोपून नवगणे रात्री घरी परत जात असताना काही अज्ञात व्यक्तींकडून मुंबई गोवा हायवेवर त्यांच्या गाडीवर दगडफेक करून त्यांच्यावर जीवघेणा हल्ला करण्यात आला.
