सोलापूर लोकसभा मतदारसंघात महायुतीचे उमेदवार राम सातपुते आणि महाविकास आघाडीचे उमेदवार प्रणिती शिंदे यांच्यात कडवी झुंज पहावयास मिळत आहे. या दोन्ही उमेदवारांनी प्रचाराला सुरुवात केली आहे. सध्या तरी प्रणिती यांनी प्रचारात आघाडी घेतल्याचे दिसत आहे.
दरम्यान प्रणिती यांनी पुन्हा एकदा सातपुते यांना डिवचले आहे. सातपुते यांना सोलापूर लोकसभा मतदारसंघात कोणी ओळखत नाही. शिवाय भाजपकडे प्रचाराचे कोणतेही मुद्दे राहिले नाहीत, अशी टीका प्रणिती यांनी आज पंढरपुरात केली.
प्रणिती यांच्या प्रचाराचा शुभारंभ आज सकाळी संत नामदेव पायरी येथे नारळ फोडून करण्यात आला. उद्या प्रणिती महाविकास आघाडीच्या नेत्यांसमवेत आपला उमेदवारी अर्ज दाखल करणार आहेत. यंदाच्या निवडणुकीत ‘मोदी मॅजिक’ चालणार नाही, असे प्रणिती यांनी नमूद केले.
