बुलढाण्यात भरधाव वेगात येणाऱ्या ट्रकने रस्त्याच्या कडेला झोपलेल्या मजुरांना चिरडले. या घटनेत चार मजुरांचा जागीच मृत्यू झाला. तर ६ मजूर गंभीर जखमी झाले आहेत. ही दुर्देवी घटना सोमवारी पहाटे साडेपाच वाजेच्या सुमारास राष्ट्रीय महामार्ग क्रमांक ६ वर घडली.
घटनेची माहिती मिळताच पोलिसांनी घटनास्थळी धाव घेतली. जखमी मजुरांना उपचारासाठी मलकापूर येथील रुग्णालयात दाखल करण्यात आले आहे. अपघातानंतर ट्रक चालकाने घटनास्थळावरुन पळ काढला असून पोलीस त्याचा शोध घेत आहेत.
मृतांची नावे अद्याप समोर आली नाही. सर्व मृत कामगार अमरावती जिल्ह्यातील असल्याची माहिती आहे. पोलिसांनी दिलेल्या माहितीनुसार, नांदुरा तालुक्यातील वडनेर भोलजी या गावाजवळ राष्ट्रीय महामार्गावरील पुलाचे काम सुरू आहे.
या कामासाठी अमरावती जिल्ह्यातील मोरगड येथून काही कामगार आले होते. काल दिवसभर काम केल्यानंतर मजूर रस्त्याच्या कडेला असलेल्या टीन शेडमध्ये झोपले होते. दरम्यान, गाढ झोपेत असताना आज पहाटे साडेपाच वाजेच्या सुमारास एक भरधाव ट्रक आला आणि थेट टीन शेडमध्ये घुसला. या घटनेत टीन शेडमध्ये झोपलेले मजूर चिरडले गेले. यातील चार मजुरांचा घटनास्थळीच मृत्यू झाला.
