लग्नाची लगबग सुरू असलेल्या एका घरात सिलेंडरचा स्फोट झाल्याने चार जणांचा जागीच मृत्यू झाला आहे. तर, ६० जण जखमी झाले आहेत. काल हा अपघात घडला.जोधपूर येथील भुंगरा गावातील एका घरात लग्न होते.
या लग्न घरातून मिरवणूक निघणार होती. स्वयंपाक सुरू असताना सिलेंडर गळती होऊ लागली. गळतीमुळे पाच सिलेंडरचा एका मागोमाग एक स्फोट झाला. अपघातावेळी घरात १०० जण होते.
सिलेंडरचा स्फोट होताच ६० जण होरपळले असून चार जणांचा मृत्यू झाला आहे. यामध्ये पाच आणि सात वर्षीय दोन लहान मुलांचाही समावेश आहे. ६० पैकी ४२ जखमींना एमजीएच रुग्णालयात दाखल करण्यात आले आहे. त्यांच्यावर उपचार सुरू असल्याची माहिती जिल्हा अधिकारी हिमांशू गुप्ता यांनी दिली. जखमींपैकी ८ जण ९० टक्क्यांहून अधिक भाजले आहेत. यामुळे मृतांचा आकडा वाढण्याची शक्यता आहे.
