छत्रपती शिवाजी महाराजांची पूजेची जगदंब तलवार महाराष्ट्रात परत आणण्यासाठी शिंदे सरकार प्रयत्न करत आहे. जगदंब तलवारीपाठोपाठ आता शिवरायांनी वापरलेली वाघ नखं देखील ब्रिटनमधून महाराष्ट्रात परत आणण्याची घोषणा राज्याचे सांस्कृतिक कार्यमंत्री सुधीर मुनगंटीवार यांनी केली आहे.
शिवाजी महाराजांनी वापरलेली वाघ नखं पुन्हा मिळवण्यासाठी केंद्रीय गृहमंत्री अमित शाह यांच्यासोबत चर्चा सुरु असल्याची माहिती मुनगंटीवारांनी दिली आहे. शिवाजी महाराजांच्या शिवराज्याभिषेक दिनाला 2024 रोजी 350 वर्षे पूर्ण होत आहे. या पार्श्वभूमीवर पुढील वर्षभर विविध कार्यक्रमाचे आयोजन करण्यात येणार आहे.
शिवरायांच्या राज्यभिषेक सोहळ्यापूर्वी वाघ नखं राज्यात आणण्याचा प्रयत्न करणार असल्याचे ते म्हणाले. शिवरायांनी वापरलेली ही वाघ नखं सध्या ब्रिटनमध्ये आहेत. ही वाघ नखं महाराजांच्या जगदंब तलवारीप्रमाणे इतिहासाची साक्षीदार आहेत. त्यामुळे शिवरायांच्या जगदंब तलवारीप्रमाणे आता वाघ नखं महाराष्ट्रात आणण्यासाठी राज्य सरकार प्रयत्नशील असल्याचे मुनगंटीवार म्हणाले.
