तू खूप क्यूट आहेस, घरी सांग उशिरा येते, फिरायला जाऊ

राज्यात एक धक्कादायक प्रकार घडला आहे. ‘तू खूप क्यूट आहेस, आपण फिरायला जाऊ,’ असे म्हणत एका शाळेच्या बसचालकाने 9 वर्षांच्या विद्यार्थिनीचा विनयभंग केल्याचे समोर आले आहे. याप्रकरणी पोलीस ठाण्यात बस चालकावर गुन्हा दाखल करण्यात आला आहे. छत्रपती संभाजीनगर शहरात ही धक्कादायक घटना घडली आहे.
मिळालेल्या माहितीनुसार, स्कूल बसमधून सर्व विद्यार्थिनी उतरल्यानंतर बस चालकाने तिचा हात पकडला आणि आपण दोघे फिरायला जाऊ, आई-वडिलांना घरी येण्यास उशीर होईल, असे सांग तसेच तू खूप क्यूट आहेस, आपण फिरायला जाऊ, असे तिला म्हणाला. तसेच त्याने बसमध्ये विद्यार्थिनीला अश्लील स्पर्श केला. हा संतापजनक प्रकार कामगार चौक ते जय भवानीनगर मार्गावरील एका स्कूल बसमध्ये घडला आहे.
याप्रकरणी मुलीच्या आई वडिलांनी पोलिसांत तक्रार दिली आहे. त्यानुसार स्कूल बस चालक गणेश संपत म्हस्के याच्यावर मुकुंदवाडी पोलिस ठाण्यात गुन्हा दाखल करण्यात आला असून त्याची न्यायालयीन कोठडीत रवानगी करण्यात आली आहे.