पुण्यात दुहेरी हत्याकांड घडल्यामुळे खळबळ माजली आहे. धारदार शस्त्रांनी वार करत दोघांची निर्घृण हत्या करण्यात आली. या प्रकरणी येरवडा पोलिसात गुन्हा दाखल करण्यात आला असून याबाबत तपास केला जातोय. शुक्रवारी मध्यरात्री येरवडा येथे हा प्रकार घडला. अनिल उर्फ पोपट वाल्हेकर आणि सुभाष उर्फ किसन राठोड अशी हत्या झालेल्या दोघांची नावे आहेत. या घटनेमुळे खळबळ माजली आहे.
येरवड्यात पांडू लमाण वस्ती येथे ही घटना घडली. अनिल वाल्हेकर, सुभाष राठोड व आणखी एक जण पहाटेच्या सुमारास मोटार सायकलवरून जात असताना त्यांना ८ ते १० जणांच्या टोळक्याने अडविले.
त्यानंतर आरोपींनी दोघांवर हल्ला करून त्यांचा खून केला. त्यावेळी त्यांचा तिसरा साथीदार पळून गेला. दोघेही सराईत गुन्हेगार असून या प्रकरणी येरवडा पोलिस ठाण्यात गुन्हा दाखल करण्यात आला आहे. पूर्ववैमनस्यातून तलवार व पालघनाने वार करीत दोघांचा खून करण्यात आल्याची माहिती पोलिसांनी दिली.
