- राज्यात एका तरुणाने अल्पवयीन मुलीवर एकतर्फी प्रेमातून जीवघेणा हल्ला करण्याचा प्रयत्न करत थेट तिच्या गळ्यावर चाकू ठेवत तिला धमकावले. मात्र, प्रसंगावधान राखून नागरिकांनी धाडस दाखवले आणि मुलीचा जीव वाचवला. ही घटना साताऱ्याच्या बसप्पा पेठ, करंजे परिसरात घडली असून त्यामुळे खळबळ माजली आहे.
- या माथेफिरू युवकाचे पीडित शाळकरी मुलीवर एकतर्फी प्रेम होते. याआधीही त्याने तिला त्रास दिल्याची माहिती समोर आली आहे. यावेळी मात्र त्याने सीमाच ओलांडली. त्याने त्या मुलीला रस्त्यावरच ताब्यात घेतले आणि गळ्यावर धारदार चाकू ठेवत धमकावले.
- घटनेच्या वेळी परिसरात गर्दी जमली होती. अनेकांनी त्या तरुणाला विनवणी केली, परंतु तो हट्टावर ठाम होता. उलट जमावाला तिथून हटण्यास सांगत होता. त्या मुलीनेही त्याला समजावण्याचा प्रयत्न केला. दरम्यान मागच्या कंपाऊंडवरून एक तरुण आला आणि त्याने त्या युवकाला मागून पकडले आणि इतरांनीही त्याच्यावर हल्ला चढवून चाकू हिसकावून घेतला. ज्या युवकाने मुलीला धमकावले होते, त्याला संतप्त जमावाने चांगलाच चोप दिला. त्यानंतर तातडीने पोलिस अधिकाऱ्यांनी घटनास्थळी धाव घेत त्याला अटक केली आहे.
एकतर्फी प्रेमातून शाळकरी मुलीच्या गळ्यावर चाकू लावला
