डोनाल्ड ट्रम्प यांचा भारताला मोठा धक्का

सध्या प्रभावशाली राजकीय स्थितीत असलेले डोनाल्ड ट्रम्प यांनी एक नवीन कायदा मंजूर करून भारतासह अनेक देशांतील नागरिकांना मोठा धक्का दिला आहे.
‘वन बिग ब्युटीफुल बिल’ या नव्या विधेयकावर ट्रम्प यांनी स्वाक्षरी केल्यानंतर “व्हिसा इंटिग्रिटी फी” नावाची एक नवीन शुल्कप्रणाली लागू करण्यात आली आहे.
2026 पासून प्रत्येक नॉन-इमिग्रंट व्हिसा अर्जदाराला 250 डॉलर्स (अंदाजे 21,400 रुपये) अतिरिक्त शुल्क भरावे लागेल. ही रक्कम सध्याच्या व्हिसा शुल्कासोबत आकारली जाणार आहे आणि ही रक्कम परत न मिळणारी असेल.
ही नवीन फी B-1/B-2, F, M, H-1B आणि J व्हिसा धारकांना लागू होणार आहे. म्हणजेच पर्यटक, विद्यार्थी, कामगार व एक्सचेंज प्रोग्राममध्ये सहभागी होणारे सर्वजण या फीच्या कक्षेत येतील. मात्र, राजनैतिक (A) आणि आंतरराष्ट्रीय संस्थांच्या (G) व्हिसा वर्गातील अर्जदारांना यापासून सूट देण्यात आली आहे.
उदाहरणार्थ, सध्या B-1/B-2 व्हिसासाठी 185 डॉलर्स (सुमारे 15,800 रुपये) शुल्क आकारले जाते. पण 2026 पासून त्यात व्हिसा इंटिग्रिटी फीचा समावेश झाल्यानंतर ही रक्कम 472 डॉलर्स (सुमारे 40,500 रुपये) इतकी होणार आहे म्हणजेच सध्याच्या खर्चाच्या सुमारे 2.5 पट.
ट्रम्प यांच्या या नव्या निर्णयामुळे भारतीय पर्यटक, विद्यार्थी आणि तात्पुरते कामगार यांना अमेरिकेचा प्रवास अधिक खर्चिक आणि नियोजनबद्ध करावा लागणार आहे. तसेच, आर्थिक व्यवहार करताना देखील काळजीपूर्वक विचार करावा लागेल, कारण शुल्क आणि कर प्रणालीत आता मोठा फरक पडत आहे.