- पुणे- सोलापूर राष्ट्रीय महामार्गावर भिगवण गावातील मदनवाडी चौकातील पुलावरून कंटेनर कोसळून कंटेनर चालकाचा जागीच मृत्यू झाला आहे.
- श्रवणकुमार भगवती प्रसाद यादव (वय-३७ वर्षे, रा. मुंबई मूळ उत्तर प्रदेश) असे अपघातात मृत्यू झालेल्या चालकाचे नाव आहे. हा अपघात आज सकाळी साडेसहा वाजताच्या सुमारास घडली.
- या अपघाताची माहिती मिळताच भिगवण पोलीस स्टेशनचे सहायक पोलीस निरीक्षक महांगडे यांनी तातडीने घटनास्थळी पोलिस कुमक पाठवून बचावकार्य सुरू करून कंटेनरमध्ये अडकलेल्या चालकाला बाहेर काढले. मात्र, उपचारापूर्वीच चालकाचा मृत्यू झाला.
- अधिक माहितीनुसार, पुणे सोलापूर राष्ट्रीय महामार्गावर भिगवण गावातील मदनवाडी चौकातील पुलाखालून बारामती -अहिल्यानगर मार्ग जातो. तर पुणे- सोलापूर राष्ट्रीय महामार्गावरील वाहतूक पुलावरून होते.
- हा कंटेनर सोलापूरकडून पुण्याच्या दिशेने चालला होता. दरम्यान चालकाचे कंटेनरवरील नियंत्रण सुटल्याने रस्त्यावर २० फूट उंचीवरून तो खाली कोसळला. या अपघातात कंटेनरचा चक्काचूर झाला आहे. अत्यंत वर्दळीच्या ठिकाणी हा अपघात झाला. सकाळी अपघात झाल्याने रहदारी कमी होती. त्यामुळे सुदैवाने मोठी जीवितहानी झाली नाही.
