मस्साजोगचे सरपंच संतोष देशमुख यांच्या हत्या प्रकरणात पोलिसांनी दाखल केलेल्या आरोपपत्रात हादरवणारे फोटो समोर आले आहेत. त्यामुळे अवघ्या महाराष्ट्रात या प्रकरणाचे तीव्र पडसाद उमटले. आता सीआयडीने या प्रकरणी 1500 पानाचे आरोपपत्र दाखल केले. यामध्ये देशमुख यांना मारहाण करताना व्हिडीओ तपास यंत्रणेच्या हाती लागले. त्यातील काही फोटो आरोपपत्रातून समोर आले आहेत. हे फोटो पाहून तुमच्याही अंगावर काटा येईल. अशातच आज बीड बंदची हाक देण्यात आली आहे.
आरोपींच्या राक्षसी कृत्यामुळे समाज माध्यमावर प्रचंड रोष व्यक्त केला जात असताना आता त्याचे पडसाद म्हणून बीडमध्ये कडकडीत बंद पुकारण्यात आला आहे. बीड बंदच्या पार्श्वभूमीवर पोलिसांकडून देखील तगडा पोलीस बंदोबस्त तैनात करण्यात आला आहे. तसेच बीड पोलिसांनी जनतेने कायदा हातात घेऊ नये, असे आवाहन केले आहे. सोशल मीडियावर पोस्ट करत बीड पोलिसांनी जनतेला आवाहन केले आहे.
देशमुख हत्या प्रकरणात गुन्हे अन्वेषन विभाग यांनी न्यायालयात दोषारोपपत्र दाखल केलं आहे. 3 मार्च रोजी तपासाचा भाग असलेले काही फोटो टीव्ही चॅनेलवर तसेच समाज माध्यमांवर प्रसारित/व्हायरल झाले आहेत. सदरील फोटो हे मन विचलित करणारे आहेत. त्यामुळे व्हायरल फोटोंवरून समाज माध्यमांवर जनतेच्या प्रतिक्रिया उमटत आहेत. सदर प्रकरण हे आता न्यायप्रविष्ट असून सदर फोटो हे न्यायालयीन प्रक्रियेचा भाग आहे. त्यामुळे जनतेने कायदा हातात घेऊ नये, असे आवाहन पोलीस अधीक्षक नवनीत काँवत यांनी केले आहे.
