राज्यात एक धक्कादायक घटना घडली आहे. गडचिरोली जिल्ह्यात नक्षलवाद्यांनी पुन्हा एकदा डोके वर काढले आहेत. काही दिवसांपासून नक्षलवादी हे सामान्य नागरिकांना लक्ष्य करत आहेत. भामरागड पंचायत समितीचे माजी सभापती सुखराम महागु मडावी (वय ४६) यांची काल रात्री त्यांनी निर्दयीपणे हत्या केली आहे. नक्षलवाद्यांनी त्यांना घरातून बाहेर फरफट आणले. तसेच त्यांची हत्या केल्याने खळबळ उडाली आहे.
मडावी हे भामरागड पंचायत समितीचे माजी सभापती होते. त्यांना जीवे मारण्याच्या धमक्या दिल्या जात होत्या. काल रात्री नक्षलवादी हे मडावी यांच्या घरात घुसले. त्यांनी त्यांना फरफटत मैदानी भागात नेले. या ठिकाणी त्यांची निर्घृणपणे हत्या करण्यात आली. नक्षलवाद्यांनी मृतदेहाजवळ पत्रक फेकले असून त्यात त्यांनी हत्या का केली याचे कारण दिले आहे. आज सकाळी मडावी यांचा मृतदेह रक्ताच्या थारोळ्यात सापडला. घटनास्थळी पोलिस दाखल झाले असून त्यांनी तपास सुरू केला आहे.
गडचिरोली जिल्ह्यातील नक्षलचळवळ हद्दपार करण्यासाठी प्रशासनाने या ठिकाणी सर्वाधिक लक्ष दिले आहे. त्यामुळे गडचिरोली जिल्ह्यात नक्षल चळवळीचा प्रभाव कमी झाला होता. मात्र, गेल्या दिवसांपासून नक्षलवादी हे पुन्हा सक्रिय झाल्याच्या अनेक घटना उघडकीस आल्या आहेत.
