सरपंच संतोष देशमुख हत्या प्रकरणाचा सुत्रधार असल्याचा वाल्मिक कराडवर आरोप होत आहेत. दरम्यान, कराड आणि बीडमधील पोलिस अधिकाऱ्यांची कॉल रेकॉर्डिंग सोशल मीडियावर व्हायरल झाली आहे. ही ऑडिओ क्लिप बनावट नोटा प्रकरणात आरोपी असलेल्या सनी आठवले या आरोपीने स्वतःच्या इंस्टाग्रामवर पोस्ट केली आहे. या ऑडिओ क्लिपमधून वाल्मिक कराड हा बीड जिल्हा पोलीस दलात हस्तक्षेप कशा पद्धतीने होता हे यातून दाखवण्याचा प्रयत्न केला आहे. (आम्ही या व्हायरल क्लिपची पुष्टी करत नाही).
देशमुख हत्या आणि खंडणी प्रकरणी आरोपी असलेला आरोपी कराड आणि बीड पोलिसांची ऑडिओ क्लिप सध्या सोशल मीडियावर व्हायरल झाली आहे. या ऑडिओ क्लिपमध्ये कराड आणि पोलिसांमधील संवाद असल्याची चर्चा सोशल मीडियावर रंगली आहे.
कराड आणि बीड शहर पोलिस ठाण्याचे पोलीस निरीक्षक शीतलकुमार बल्लाळ यांचा ऑडिओ कॉल सध्या व्हायरल होत आहे. गुन्हेगार सनी आठवले याच्यावर कारवाई करू नका. त्याला कशात गुंतवू नका. तो सध्या माझ्याकडे कार्यरत नसला तरीही तो माझ्या भावासारखा आहे. सध्या स्थानिक राजकारणामुळे योगेश आणि त्याचे जमत नाही म्हणून तो सध्या तिकडे गेला आहे, असा संवाद व्हायरल झाला आहे.
दरम्यान सदर क्लिप खोटी आहे. क्लिपमधील संवाद माझा नाही. सनी आठवले हा गुन्हेगार आहे. त्याचा भाऊ देखील गुन्हेगार आहे. सनी सध्या फरार आहे. यातील आवाज माझा नाही. याप्रकरणी मी गुन्हा दाखल करणार आहे, असे बल्लाळ म्हणाले.
Admin 
