सध्या विविध भागांमध्ये अपघातचे प्रमाण मोठ्या प्रमाणात वाढत आहे. दरम्यान, कर्नाटकातील उत्तर कन्नड जिल्ह्यातील यल्लापूर तालुक्यात भीषण अपघाताची घटना घडली आहे. यल्लापूर तालुक्यातील गुळ्ळापुर नजीक भाजीपाल्याने भरलेला ट्रक पलटी होऊन भीषण अपघाताची घटना घडली. या दुर्घटनेत ट्रकमधील दहा जण ठार झाले. तर, दुसऱ्या दुर्घटनेत तीन विद्यार्थ्यांसमवेत चार जणांचा मृत्यू झाल्याचीही दुर्घटना घडली. कर्नाटकच्या रायपूर जिल्ह्यात ही घटना घडली. सिंधनूर पोलीस ठाण्याच्या हद्दीत चारचाकी वाहन पलटी होऊन ही अपघाताची घटना घडली आहे. नरहरी मंदिरात पूजा करण्यासाठी विद्यार्थ्यांची कार हम्पीच्या तिर्थयात्रेसाठी निघालेली होती. मात्र, भीषण दुर्घटनेत कारमधील चार जणांचा मृत्यू झाला. परिणामी, कर्नाटकमधील अपघाताच्या घटनेत एकूण 14 जणांचा मृत्यू झाला आहे.
कन्नड जिल्ह्यातून जाणाऱ्या राष्ट्रीय महामार्ग 63 वर आज सकाळी ही दुर्घटना घडली आहे. भाजीपाल्यांनी भरलेल्या ट्रकतून पंचवीस जण प्रवास करत होते. गुळ्ळापुरजवळील घट्टा परिसरात हा ट्रक पलटल्यानंतर लॉरीतून प्रवास करणाऱ्या दहा जणांचा जागीच मृत्यू झाला. तर ट्रकमधील इतर 11 जण गंभीर जखमी झाले आहेत.
दरम्यान पहाटेच्या सुमारास भाजीपाला घेऊन जाणाऱ्या ट्रकसोबत घट्टा परिसरात पहाटे धुक्याचे वातावरण असल्याने ही दुर्घटना घडल्याचे सांगण्यात येत आहे. धुक्याच्या वातावरणामुळे पुढील वाहनाचा अंदाज न आल्याने ट्रक पुढच्या वाहनाला धडकला आणि चालकाचा ट्रकवरील ताबा सुटला. त्यानंतर बाजुच्या खड्ड्यात ट्रक पडला असल्याचे प्राथमिक माहितीनुसार सांगण्यात येत आहे.
