मस्साजोग येथील सरपंच संतोष देशमुख यांच्या खून प्रकरणी तपास सुरु असून या प्रकरणात आरोप असलेला वाल्मिक कराड याला पुण्यात अटक करण्यात आली आहे. ‘महाराष्ट्र देशा’च्या वृत्तानुसार, सीआयडीच्या पथकाने कराड याला अटक केल्याची माहिती समोर आली आहे. सरपंच संतोष देशमुख यांच्या खूनप्रकरणात कराड याचे नाव आल्यापासून प्रकरण तापले. यात आमदार सुरेश धस यांनीही मुद्दा लावून धरत त्याचे ‘आका’ शी संबंध असल्याचा आरोप केला आहे. दरम्यान हा मुद्दा विधानसभेतही गाजला होता.
दरम्यान पसार वाल्मिक कराडची संपत्ती जप्त करण्याचे आदेश पोलिस प्रशासनाला देण्यात आले होते. मात्र, वाल्मिक कराडला अटक केल्याचे वृत्त सीआयडीने फेटाळून लावले आहे. कराडला अटक करण्यात आलेली नाही, असे सीआयडीच्या अधिकाऱ्यांनी स्पष्ट केले आहे.
चारही बाजूंनी कोंडी झाल्यामुळे कराड हे आता पोलिसांसमोर शरणागती पत्कारणार असल्याचे सांगितले जात आहे. कराड हे आज संध्याकाळपर्यंत किंवा उद्या सकाळपर्यंत बीड पोलीस अथवा सीआयडीच्या अधिकाऱ्यांसमोर शरण जातील, अशी चर्चा सुरु आहे.
