- राज्यात एक मन हेलावणारी बातमी समोर येत आहे. साजगाव यात्रेसाठी माथेरानमधून गेलेल्या तीन तरुणांच्या दुचाकीला भीषण अपघात झाला आहे. त्यातील दोन तरुणांचा मृत्यू झाला आहे तर एकजण जबर जखमी आहे. दोन तरुणांच्या मृत्युमुळे संपूर्ण माथेरानवर शोककळा पसरली आहे. त्यांना श्रद्धांजली म्हणून मंगळवारी माथेरानमध्ये बंद पाळण्यात आला.
- कार्तिकी एकादशीपासून खालापूर तालुक्यातील साजगाव यात्रेला सुरुवात झाली आहे. बोंबल्या विठोबाचे दर्शन आणि यात्रा असा दुहेरी आनंद घ्यायला भाविकांची गर्दी होत आहे. सोमवारी रात्री माथेरानमधून सहा तरुण दोन दुचाकी घेऊन यात्रेला आले होते. साजगाव यात्रेवरून ते पुन्हा माथेरानला परतत असताना त्यांचा महड फाट्याच्या पुढे समोरील उभ्या असलेल्या टेम्पोला त्यांच्या एका दुचाकीने जोरदार धडक दिली.
- ही धडक एवढी भीषण होती की अजय आखाडे (18) आणि दर्शन वेताळ (16) यांचा मृत्यू झाला. तर प्रथमेश सोनवणे (17) हा युवक जबर जखमी झाला आहे. तिन्ही जखमी युवकांना तात्काळ कळंबोलीममधील एमजीएम रुग्णालयात दाखल करण्यात आले. मात्र, दर्शन वेताळ याचा जागेवरच मृत्यू झाला तर पहाटेच्या सुमारास अजय याने शेवटचा श्वास घेतला. अडीच वर्षांपूर्वी अजय आखाडेच्या वडिलांचे निधन झाले होते.
