- काँग्रेसचे ज्येष्ठ नेते तथा माजी मुख्यमंत्री पृथ्वीराज चव्हाण यांनी बुधवारी मविआच्या जागावाटपातील चुकांवर बोट ठेवले. आमच्या मित्रपक्षांनी आपल्या जागांचा आकडा वाढवण्यासाठी दिलेले काही उमेदवार निवडून येण्याची अजिबात शक्यता नाही, असे ते म्हणालेत. त्यांच्या या विधानाची राज्याच्या राजकीय वर्तुळात चर्चा सुरु झाली आहे.
- चव्हाण एका मुलाखतीत बोलताना म्हणाले की,काँग्रेसने दावा केलेल्या जागांवर मित्रपक्षाने अगदीच चुकीचे उमेदवार दिले. त्यांनी आपल्या जागांचा एकूण आकडा वाढवण्यासाठी असे केले. पण त्यांनी दिलेल्या उमेदवारांची निवडून येण्याची कोणतीही शक्यता नाही. हे उमेदवार कोणत्या पक्षाचे आहेत हे मी सांगणार नाही. काही ठिकाणी काँग्रेसचेही उमेदवार बंडखोर झाले. दोन-तीन उदाहरणे माझ्या डोळ्यांपुढे आहेत. हे उमेदवार निवडून येण्याची शक्यता आहे. पण पुढे नेमके काय होईल? हे मला माहिती नाही. चव्हाण म्हणाले, महाविकास आघाडीच्या वाटाघाटीत काही चुका झाल्या. या चुका प्रामुख्याने दोन गोष्टींमध्ये झाल्या. उद्धव ठाकरे व शरद पवार यांनी त्यांच्या नेत्यांना वाटाघाटीसाठी पाठवले. ते स्वतः प्रचारासाठी मोकळे राहिले. याऊलट आमच्या बाजूने सर्वच नेते स्वतः वाटाघाटीसाठी गेले. यामुळे रस्त्यावर कुणीच उरले नाही. काँग्रेस पक्षाने अंतर्गत बैठक घेऊन, या मुद्यावर गांभीर्याने चर्चा करून जागावाटपावरील आपली भूमिका ठरवण्याची गरज होती.
