आंतरधर्मीय विवाह करणाऱ्या महिलांच्या सुरक्षेकरता शिंदे सरकारने मोठा निर्णय घेतला आहे. येत्या ७ ते १० दिवसांत सरकारकडून १० सदस्यीय समिती नेमण्यात येणार आहे. या समितीकडून आंतरधर्मीय प्रेमविवाह करणाऱ्या मुलींच्या सुरक्षेची काळजी घेण्यात येणार आहे, अशी माहिती महिला आणि बालविकास मंत्री मंगलप्रभात लोढा यांनी आज दिली. राज्यात लव्ह जिहादविरोधी कायदा होण्याकरता सरकार प्रयत्नशील आहे.
यासाठी विविध राज्यातील कायद्याचा अभ्यास केला जातोय, अशी माहिती उपमुख्यमंत्री देवेंद्र फडणवीस यांनी दिली होती. तसंच, या कायद्याबाबत हिवाळी अधिवेशनातही चर्चा होणार असल्याची शक्यता व्यक्त करण्यात येतेय.
दरम्यान, श्रद्धाचे वडील विकास वालकर यांनीही काल पत्रकार परिषद घेत धर्माधारित जनजागृती करण्याचे आवाहन सरकारला केले आहे. श्रद्धा हत्येसारखे प्रकार भविष्यात टाळण्याकरता लव्ह जिहादविरोधी कायदा आणण्याची मागणी जोर धरू लागली आहे.या कायद्याआधीच सरकार १० सदस्यीय समिती नेमणार आहे. या समितीतून कुटुंबाच्या इच्छेविरोधात लग्न करणाऱ्या मुलामुलींशी ही समिती संवाद साधणार आहे. गरज पडल्यास त्यांना मदतही करणार आहे.
