पुण्यात गुन्हेगारी वाढली आहे. दरम्यान कारने जाणाऱ्या एका अभियंत्यावर तब्बल ४० ते ५० जणांच्या टोळक्याने हल्ला केला. या टोळक्यातील काही जणांनी हातात कोयते आणि लाकडी दांडके घेऊन पाठलाग केला. या घटनेचा व्हिडिओ सोशल मिडियावर व्हायरल होत आहे.
पुण्यात कारने जाणाऱ्या एका अभियंत्याच्या गाडीवर तब्बल ४० ते ५० जणांच्या टोळक्याने हल्ला केला. यातील काही जणांच्या हातामध्ये कोयते, चाकू, तलवारी, लाकडी दांडके होते. या टोळक्याने कार चालक अभियंत्याचा बाईकवरून पाठलाग केला. तसेच गाडीवर दगड मारले. गाडीतील अभियंता व त्याची पत्नी यावेळी घाबरली होती. या घटनेचा व्हिडिओ अभियंत्याने सोशल मिडियावर पोस्ट केला असून तो व्हायरल झाला आहे. याप्रकरणी पौड पोलिसांनी गुन्हा दाखल केला आहे.
पोलिसांनी दिलेल्या माहितीनुसार सुसगाव येथे राहणाऱ्या रवी करणानी या अभियंत्याने याप्रकरणी पोलीसांत तक्रार दिली आहे. ही घटना २९ सप्टेंबर रोजी लवळे गाव ते नांदेगाव या रस्त्या दरम्यान घडली. अभियंत्याने हा व्हिडिओ सोशल मिडियावर टाकला असून तो व्हायरल झाला आहे.
रवी हे २९ सप्टेंबर रोजी लवळे ते नांदेगाव रस्त्याने जात होते. यावेळी या रस्त्यावर वेगवेगळ्या ठिकाणी एकूण ४० ते ५० जण हातात लोखंडी रॉड, दगड, कोयते, तलवारी व काठ्या घेऊन रवी यांच्या गाडीवर हल्ला करत होते. तर दोन बाईकवरुन काही गुंडांनी त्यांचा पाठलाग केला. तर काहींनी त्यांना गाडी थांबवण्यास सांगून शिवीगाळदेखील केली. मात्र, रवी यांनी गाडी न थांबवता थेट पुण्यात आणली.
