- देशात लोकसभा निवडणुकीच्या पार्श्वभूमीवर राजकीय वातावरणात चांगलेच तापू लागले आहे. राजकीय पक्षांकडून प्रचार केला जात आहे. विविध ठिकाणी जाहीर सभा होत आहेत. देशात एकूण सात टप्प्यात मतदान होणार आहे. दरम्यान, माढा मतदारसंघात भाजपामधील वजनदार नेत्याला फोडून उमेदवारी दिल्यानतंर आता शरद पवारांनी ही जागा जिंकण्यासाठी वेगळे डावपेच सुरू केले आहेत. या मतदारसंघातील वजनदार नेते उत्तम जानकर यांना आपल्या बाजूने वळवण्यासाठी आता पवारांनी प्रयत्न सुरू केले आहेत.
माढा मतदारसंघात भाजपाने रणजितसिंह नाईक निंबाळकर यांना पुन्हा एकदा रिंगणात उतरवले आहे. निंबाळकर यांच्या उमेदवारीला भाजपामधीलच अनेक नेत्यांचा विरोध होता. मात्र, भाजपा निंबाळकरांच्या उमेदवारीवर ठाम राहिल्याने मोहिते पाटील कुटुंबीयांनी शरद पवार गटात प्रवेश केला. पवारांनी लगेचच माढ्यातून धैर्यशील मोहिते पाटील यांना उमेदवारी जाहीर केली आहे. दरम्यान, जानकर यांनी नुकतीच पुण्यात पवारांची बैठक घेतली. या बैठकीनंतर जानकर यांनी १९ तारखेला अंतिम निर्णय होईल, असे म्हणत सस्पेन्स कायम ठेवला आहे.
