३७ वर्षांपूर्वी गुजरात विधानसभा निवडणुकीत काँग्रेसने विक्रमी १४९ जागा जिंकून सरकार स्थापन केले होते. पण गेल्या २७ वर्षांपासून मोदी यांची गुजरातमध्ये जादू सुरू असून या निवडणुकीतही भाजपने विक्रमी विजय मिळवला आहे. या निवडणुकीत भाजप १९८५चा कॉँग्रेसचा १४९ जागांचा विक्रम तोडणार आहे. तर बंगालमधील डाव्यांचा विक्रमही भाजप मोडू शकतो.
१९८५ मध्ये माधवसिंह सोलंकी यांच्या नेतृत्वाखाली काँग्रेसने गुजरातमध्ये १४९ जागा जिंकल्या. मात्र, यावेळी भाजप हा विक्रम मोडीत काढणार असल्याचे मानले जात आहे. भाजपने सकाळपासूनच सर्व पक्षांना मागे टाकत १५० हून अधिक जागांवर आघाडी घेतली आहे.
दरम्यान भाजपच्या या विजयाबद्दल माजी मुख्यमंत्री उद्धव ठाकरे यांनी भाजपचे अभिनंदन केले आहे. भाजपचा हा विजय ऐतिहासिक असल्याचे ठाकरे यांनी सांगितले. निवडणुकीतील या विजयाबद्दल केंद्रीय गृहमंत्री अमित शहा यांनी मतदारांचे आभार मानले आहेत.
