महाराष्ट्रातील राजकारणात वादंग निर्माण होत असल्याचं चित्र दिसत आहे. मुख्यमंत्री एकनाथ शिंदे यांनी बंडाळी केल्यानंतर शिवसेनेत उभी फूट पडली आहे. शिवसेनेत उभी फूट पडल्यानंतर शिंदे गट आणि ठाकरे गट असे दोन गट निर्माण झाले.
त्यानंतर शिंदे गट- ठाकरे गटाच्या नेत्यांकडून आरोप-प्रत्यारोपला सुरूवात झाली. हे प्रकरण सुप्रीम कोर्टापर्यंत पोहोचलं. शिवसेना नक्की कुणाची? हा प्रश्न केंद्रीय निवडणूक आयोगासमोर अद्यापही प्रलंबित आहे. अंधेरी पोटनिवडणुकीच्या पार्श्वभूमीवर शिवसेना नाव आणि चिन्ह गोठवण्यात आले. परंतु आता शिवसेनेच्या नावावर तिसऱ्याच व्यक्तीने दावा ठोकला आहे.
१७ नोव्हेंबर रोजी बाळासाहेब ठाकरे यांचा स्मृतिदिन होता. याच दिवशी महाड तालुक्यातील किये-गोठवली येथील माजी उपसरपंच पांडुरंग वाडकर यांनी बाळासाहेबांच्या स्मृतिदिनानिमित्त आपल्या कन्येच्या नामकरण विधी कार्यक्रमाचे आयोजन केले होते. यावेळी त्यांनी आपल्या कन्येचे नावच शिवसेना, असे ठेवल्यामुळे सर्वांना आश्चर्याचा धक्का बसला.महाडच्या वाडकर कुटुंबात आनंदोत्सव साजरा करण्यात आला. वाडकर यांनी प्रसार माध्यमांशी संवाद साधला. ते म्हणाले की, स्वर्गीय बाळासाहेब माझ्या स्वप्नात आले होते. बाळासाहेब ठाकरेंचा मी कट्टर कार्यकर्ता आहे. त्यामुळे त्यांचे स्वप्न पूर्ण करण्यासाठी मी माझ्या मुलीचे नाव शिवसेना, असे ठेवले आहे.
