पूरग्रस्त धाराशिवमध्ये अधिकारी रंगल्या नवरात्र महोत्सवात

महाराष्ट्रात गेल्या चार दिवसांपासून सातत्याने मुसळधार पाऊस पडत असून यामुळे शेती आणि जनजीवनाला मोठा फटका बसला आहे. हजारो लोकांची घरे उद्ध्वस्त झाली आहेत आणि शेतकऱ्यांची परिस्थिती अत्यंत गंभीर झाली आहे. दरम्यान धाराशिव जिल्हा भीषण पुराशी झुंज देत असताना प्रशासनातील वरिष्ठ अधिकारी सांस्कृतिक कार्यक्रमात रंगल्याचा व्हिडिओ समोर आला आहे. जिल्हाधिकारी कीर्ती किरण पुजार यांचा तुळजापूर येथील नवरात्र महोत्सवात डान्स करतानाचा व्हिडिओ २४ सप्टेंबर रोजीचा असल्याचे समजते. हा व्हिडिओ सोशल मीडियावर व्हायरल होत असून नागरिकांनी तीव्र संताप व्यक्त केला आहे.
पूरामुळे हजारो हेक्टर शेती पाण्याखाली गेली आहे, शेतकरी हवालदिल झाले आहेत. अशा परिस्थितीत जिल्ह्याचे महसूल अधिकारी नाचगाण्यात रमल्याचे चित्र धक्कादायक असल्याचे नागरिकांचे म्हणणे आहे. शेतकऱ्यांना आधार देण्याची वेळ आली आहे, पण अधिकारी मात्र डान्स करत आहेत, अशा शब्दांत नागरिकांनी प्रशासनावर टीका केली आहे.
यापूर्वीच नवरात्र महोत्सवासाठी तब्बल साडेआठ कोटी रुपये खर्च केल्याचा आरोप नागरिकांनी केला होता. पूरग्रस्तांना मदतीची गरज असताना एवढा पैसा सांस्कृतिक कार्यक्रमांवर खर्च करणे योग्य आहे का, असा सवाल उपस्थित होत आहे.
या प्रकरणावर खासदार ओमराजे निंबाळकर यांनी नाराजी व्यक्त केली आहे. त्यांनी सांगितले की, पूरग्रस्तांच्या वेदना कमी करण्यासाठी संवेदनशीलता दाखवणे गरजेचे आहे. हा महोत्सव रद्द करून तो निधी पूरग्रस्तांसाठी वापरायला हवा होता, असे त्यांनी म्हटले. मात्र, त्यांनी हेही स्पष्ट केले की, जिल्हाधिकारी रात्री उशिरा पूरग्रस्तांशी संपर्क साधत होते. त्यामुळे या घटनेकडे एकतर्फी पाहता कामा नये. तरीसुद्धा शेतकऱ्यांची अवस्था बिकट असून त्यांच्याकडे सर्वांनी लक्ष देणे आवश्यक असल्याचे त्यांनी अधोरेखित केले.