मुख्यमंत्री फडणवीसांकडून तातडीने मदतीचे आदेश

महाराष्ट्रात सुरू असलेल्या अतिवृष्टीमुळे अंदाजे 70 लाख एकर पिकांचे नुकसान झाले आहे. अनेक गावांमध्ये पूरस्थिती आहे, ज्यामुळे शाळा, घरे आणि इतर पायाभूत सुविधाही मोठ्या प्रमाणावर नुकसान झाल्या आहेत. राज्यातील कॅबिनेटची बैठक सुरू असताना शासनाने मोठी आर्थिक मदत जाहीर केली आहे.
खरीप 2025 सत्रासाठी नुकसानग्रस्त शेतकऱ्यांना 2,215 कोटी रुपये वितरण करण्याचा निर्णय घेण्यात आला असून 31.64 लाख शेतकऱ्यांच्या खात्यात ही रक्कम तातडीने जमा होणार आहे. मदत व पुनर्वसन विभागाने याबाबतचा शासन निर्णय अधिकृतपणे जाहीर केला आहे.
विदर्भ, मराठवाडा, तसेच पश्चिम आणि उत्तर महाराष्ट्रातील अनेक जिल्ह्यांना मुसळधार पावसाने तडाखा दिला आहे. विदर्भातील जिल्हे आणि मराठवाड्यातील धाराशिव, नांदेड, बीड यांसह काही भाग गंभीर नुकसानग्रस्त आहेत. सध्या पावसामुळे काही भागांमध्ये पंचनामे अद्याप पूर्ण झालेले नाहीत. पाणी ओसरल्यावर तिथे पंचनामे करणे सुरू केले जाईल. राज्यातील प्रशासन सतत परिस्थितीवर लक्ष ठेवत असून नुकसानग्रस्त भागांसाठी तातडीची मदत देण्याची तयारी सुरु आहे.
याशिवाय, जून ते ऑगस्ट 2025 दरम्यान झालेल्या नुकसानीसाठी राज्य सरकारने 1,339 कोटी रुपये अतिरिक्त मदत जाहीर केली आहे. बीड, धाराशिवसह काही जिल्ह्यांमध्ये अद्याप रेस्क्यू ऑपरेशन सुरू आहेत, ज्यात हेलिकॉप्टरच्या मदतीने पुरात अडकलेल्या नागरिकांची सुटका केली जात आहे, असे मुख्यमंत्री देवेंद्र फडणवीस यांनी सांगितले.