विद्यार्थ्यांना चांगले शिक्षण देऊन त्यांच्यावर सत्य, प्रामाणिकपणाचे संस्कार करावे, अशी अपेक्षा शिक्षकांकडून करण्यात येते. मात्र, जळगावमध्ये एक धक्कादायक प्रकार समोर आला आहे. दहावीच्या विद्यार्थ्यांना परीक्षा केंद्रावर रिक्षात बसून कॉपी करणाऱ्या मुख्यध्यापिका, शिक्षकासह तिघांविरोधात गुन्हा दाखल केला आहे. शिक्षकांचाच कॉपीत सहभाग असल्याचे समोर आल्याने खळबळ उडाली आहे.
जळगावच्या यावल तालुक्यातील किनगाव येथील दहावीच्या परीक्षा केंद्रावर मराठीचा पेपर सुरू होता. यावेळी विद्यार्थ्यांना कॉपी पुरवण्यासाठी केंद्राबाहेर एका रिक्षात बसून कॉपी तयार करणाऱ्या मुख्याध्यापिका, शिक्षक आणि एका महिलेविरुद्ध गुन्हा दाखल करण्यात आला आहे. या प्रकरणाचा व्हिडिओ व्हायरल झाल्यानंतर शैक्षणिक क्षेत्रात खळबळ उडाली आहे. याबाबत यावल पंचायत समितीचे प्रभारी गट शिक्षणाधिकारी विश्वनाथ धनके यांनी तक्रार दिली आहे.
किनगाव येथील नेहरू माध्यमिक विद्यालय केंद्रावर सकाळी दहावीचा मराठी द्वितीय व तृतीय विषयाचा पेपर सुरू होता. एका रिक्षात सरदार वल्लभभाई पटेल स्कूलच्या मुख्याध्यापिका आणि तेथील दोन शिक्षक असे तिघेजण कॉपी पुरवण्याच्या उद्देशाने अपेक्षित प्रश्नसंचातून प्रश्नोत्तरे पाहून कॉपी बनवत होते. याबाबत व्हिडिओ सोशल मीडियावर व्हायरल झाला. त्यानुसार यावल पोलीस ठाण्यात तिघांविरुद्ध गुन्हा दाखल करण्यात आला आहे.
