- देशभरात खळबळ उडवून देणाऱ्या “सुटकेस मर्डर केस” अर्थात कविता बडाला हत्या प्रकरणी आज वसई न्यायालयात आरोपींना जन्मठेपेची शिक्षा सुनावली आहे. मे 2016 मध्ये बडाला या 27 वर्षीय विवाहितेची आर्थिक वादातून अपहरण करून हत्या करण्यात आली होती. त्यानंतर मृतदेह बॅगमध्ये भरून डहाणू तालुक्यात जाळून टाकली होती.
- तसेच कविताची हत्या केल्यानंतरही तिच्या वडिलांकडून 30 लाख रुपये आणि 3 किलो सोन्याची खंडणी मागितली होती. याप्रकरणी अर्नाळा पोलीस ठाण्यात गुन्हा दाखल झाला होता. तीन पुरुष आणि एका महिला आरोपी विरोधात वसई न्यायालयात दोषारोप सिद्ध झाल्यामुळे वसई न्यायालयाने या चारही आरोपींना जन्मठेपेची शिक्षा सुनावली आहे.
- या हत्याकांड प्रकरणी आरोपी मोहितकुमार भगत, रामअवतार शर्मा, शिवा रामकुमार शर्मा आणि युनिता शरवनंद या चार आरोपीना अर्नाळा पोलिसांनी सापळा रचून खंडणीचे पैसे स्वीकारताना अटक केली होती. 15 मे 2016 रोजी घडलेल्या या हत्याकांडाप्रकरणी पोलिसांनी सापळा रुचून 17 मे रोजी खंडणीची रक्कम स्वीकारताना आरोपींच्या मुसक्या आवळल्या होत्या. या सर्व आरोपींवर अर्नाळा पोलीस ठाण्यात गुन्हे दाखल करण्यात आले होते. त्यांच्यावरील दोषारोप सिद्ध झाले होते. त्यामुळे त्यांना शिक्षा काय होते, याकडे सर्वांचे लक्ष होते. त्यात वसई न्यायालयाने आज या चारही आरोपींना जन्मठेपेची शिक्षा सुनावली.
- विरारमध्ये राहणारी मयत कविता (वय 27) ही रत्नम इन्फोटेक कंपनीत चैन मार्केटिंग काम करत होती. आरोपी मोहितकुमार हा तिच्या सोबत काम करत होता. 15 मे 2016 या दिवशी आरोपी रामअवतार आणि शिवा शर्मा हे कंपनीत मेंबर होणार होते. त्यामुळे कविताने सकाळी 9.15 वाजताच आपले घर सोडून ती विरार पश्चिमेला ग्लोबल सिटी परिसरातील आरोपी मोहितकुमार याच्या घरी गेली होती. मात्र, कविता ही संध्याकाळपर्यंत घरी पोहोचलीच नाही. तसेच तिचा फोन बंद येत होता. दुसऱ्या दिवशी कविताची बहीण शीतल कोठारी हिने अर्नाळा पोलीस ठाण्यात बहिण कविता हरविल्याची तक्रार दाखल केली होती. याबाबतची माहिती तिने वडील किशनलाल कोठारी यांना दिली. त्याच दिवशी सांयकाळी 6 वाजता शीतल हिला अंधेरी रेल्वे स्टेशनच्या स्टेशन मास्तर यांनी फोन करून कविताचा लॅपटॉप आणि इतर साहित्य असलेली बॅग अंधेरी स्थानकात सापडल्याचे सांगितले होते.
- आरोपी मोहितकुमार याच्याकडून रत्नम इन्फोटेक कपंनीच्या आर्थिक व्यवहाराचे घेतलेले पैसे कविता बडला हिने परत केले नव्हते. या कारणावरून मोहितकुमार याने कविताची हत्या केली. त्यावेळी आरोपी रामअवतार शर्मा, शिवा शर्मा यांनी या हत्येत मदत केली होती.
- शिवाय आरोपी युनिता शरवन हिनेही आरोपींना सहकार्य केले होते. त्यानंतर शिव शर्मा याने कविताची बॅग अंधेरी स्थानकात सोडून दिली होती. पुढे आरोपींनी भाडयाने गाडी आणली. त्या गाडीच्या डिकीत कविताचे प्रेत ठेवले. त्याआधी हे प्रेत त्यांनी एका बॅगमध्ये ठेवले होते. पुढे ही बॅग एका घाटा टाकण्यात आली. शिवाय ती पेट्रोल टाकून जाळण्यात ही आली.
