- राज्यात महायुतीची निर्विवाद सत्ता आली असून मुख्यमंत्रीपद भाजपकडे जाणार आहे. नवे मुख्यमंत्री म्हणून पुन्हा एकदा देवेंद्र फडणवीस यांचे नाव त्यांचे समर्थक पुढे करत असले तरी हायकमांडच्या मनात वेगळंच सुरू असल्याची शंका आहे. यापदासाठी इतर नावांचाही विचार सुरू आहे. तसे झाल्यास फडणवीसांना दुसऱ्यांदा धक्का बसणार आहे.
- नुकत्याच झालेल्या विधानसभा निवडणुकीत महायुतीला २३० जागा मिळाल्या आहेत. परिणामी सत्ता कुणाची हे स्पष्ट झाले आहे. मुख्यमंत्री एकनाथ शिंदे यांनी राजीनामा दिल्याने नवा मुख्यमंत्री कोण होणार याविषयी उत्सुकता आहे.
- भाजपमध्ये पुन्हा एकदा फडणवीसांच्या नावाची चर्चा सुरू आहे. मात्र, अद्यापही भाजपच्या विधिमंडळ पक्षाच्या नेत्याची निवड झालेली नाही. परिणामी वेगळी चर्चा सुरू झाली आहे. भाजपकडून मराठा किंवा ओबीसी नेत्याला मुख्यमंत्रिपद दिले जाण्याची दाट शक्यता आहे.
- याच वर्षी झालेल्या लोकसभा व विधानसभा निवडणुकीत मराठा व ओबीसी आरक्षणाचा मुद्दा प्रचंड गाजला होता. लोकसभेला मराठा समाजाच्या नाराजीचा फटका भाजपला बसला. मात्र, विधानसभेला मराठा समाजानेही महायुतीला मतदान केल्याचे दिसून आले. भाजपचा परंपरागत ओबीसी मतदारही सोबत राहिला. परिणामी सत्ता आल्यानंतर आता त्याच वर्गातील एखाद्या व्यक्तीला मुख्यमंत्रिपद देण्याचा विचार सुरू असल्याचे सूत्रांकडून समजते.
